ភ្នំពេញ ៖ ក្រសួងសាធារណការត្រៀមជួសជុលកែលម្អកំណាត់ផ្លូវចំនួន២២ខ្សែនៅក្នុងខេត្តព្រះសីហនុឡើងវិញ ដើម្បីលើកកម្ពស់សោភ័ណភាពនិងបង្កលក្ខណៈងាយស្រួលដល់ការធ្វើ ដំណើរ ព្រមទំាងទាក់ទាញភ្ញៀវទេសចរទៅលេងខេត្តជាប់សមុទ្រមួយនេះឲ្យបានកាន់តែច្រើន។ រដ្ឋមន្រ្តីក្រសួងសាធារណការនិងរដ្ឋបាលខេត្តព្រះសីហនុចាប់ផ្តើមរួមគ្នារិះរកនីតិវិធីពន្លឿនការជួសជុលកំណាត់ផ្លូវដែលរងការខូចខាតចំនួន២២ខែ្សឡើងវិញឲ្យបាននៅពេលឆាប់ៗនេះ ខណៈខេត្តនេះត្រៀមរៀបចំព្រឹត្តិការណ៍បុណ្យសមុទ្រនៅឆ្នាំ២០២០ និងកិច្ចប្រជុំអាស៊ាននាពេលខាងមុខនេះ។ ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានឲ្យ ដឹងថា ការស្ថាបនាផ្លូវនិងហេដ្ឋារចនាសម្ព័ន្ធនានានៅក្នុងខេត្តព្រះសីហនុនេះ ដើម្បីស្តារមុខមាត់ ខេត្តនេះឲ្យកាន់តែមានសោភ័ណភាពស្រស់ស្អាតដែលជាទីទាក់ទាញភ្ញៀវទេសចរ និងការ អភិវឌ្ឍផ្នែកសេដ្ឋកិច្ច។ ឯកឧត្តមទេសរដ្ឋមន្រ្តីបានអៈអាងថា ផ្លូវទំាង២២ខ្សែនៅក្នុងខេត្តព្រះសីហនុនេះ គឺជាផ្លូវប្រកបដោយសក្ដានុពលសេដ្ឋកិច្ចខ្ពស់ដែលជួយសម្រួលដល់ការដឹកជញ្ជូនរបស់បងប្អូនប្រជាពលរដ្ឋ កាត់បន្ថយការកកស្ទះចរាចរណ៍និងគ្រោះថ្នាក់ចរាចរណ៍ និងការគ្រប់គ្រងហេដ្ឋារចនាសម្ព័ន្ធប្រព័ន្ធបង្ហូរទឹក។ ឯកឧត្ដមទេសរដ្ឋមន្ត្រីបានគូសបញ្ជាក់ថា ខេត្តព្រះសីហនុមានសក្កានុពលខ្លំាងលើវិស័យទេសចរណ៍និងជាប៉ូលសេដ្ឋកិច្ចដ៏សំខាន់របស់ព្រះរាជាណាចក្រកម្ពុជា ដោយសារខេត្តនេះមានលំហូរចូលនូវការវិនិយោគយ៉ាងគំហុកទាក់ទងនឹងវិស័យឧស្សាហកម្ម ទេសចរណ៍ រោងចក្រ និងសហគ្រាសផ្សេងៗរបស់ក្រុមហ៊ុនជាតិ និងអន្តរជាតិ ប៉ុន្តែកត្តាធម្មជាតិរបស់ខេត្តនេះជាបញ្ហាប្រឈមធ្វើឱ្យកំណាត់ផ្លូវមួយចំនួនទទួលរងនូវការខូចខាតដោយ អន្លើ ដែលចាំបាច់ត្រូវដោះស្រាយដើម្បីសម្រួលដល់ការដឹកជញ្ជូនរបស់បងប្អូនប្រជាពលរដ្ឋផងដែរ។ សូមបញ្ជាក់ថា រដ្ឋបាលខេត្តព្រះសីហនុកំពុងពន្លឿនការកសាងជួសជុលហេដ្ឋារចនាសម្ព័ន្ធផ្លូវថ្នល់និងហេដ្ឋារចនាសម្ព័ន្ធប្រព័ន្ធបង្ហូរទឹកកខ្វក់ និងទឹកភ្លៀងឱ្យបានចប់សព្វគ្រប់នាមុនឆ្នាំ២០២០ត្រៀមរៀបចំស្វាគមន៍ពិធីបុណ្យសមុទ្រនៅឆ្នាំ២០២០ និងកិច្ចប្រជុំអាស៊ានឆ្នាំ២០២២នាពេលខាងមុខ៕