ភ្នំពេញ ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ត្រីក្រសួង សាធារណការ និងដឹកជញ្ជូន កាលពីថ្ងៃទី៧ ខែកក្កដា ឆ្នាំ២០១៩ បានដឹកនាំមន្ត្រីសាធារណការ និងអ្នកស្រុកកោះធំជាង២០០នាក់ ទៅសិក្សា ស្វែងយល់ប្រវត្តិតស៊ូ ដើម្បីសន្តិភាព និងការអភិវឌ្ឍ របស់ថ្នាក់ដឹកនាំកម្ពុជា ដែលឆ្លាក់ជាប់លើជញ្ជាំង និងតាំងបង្ហាញពាស ពេញបរិវេណ នៃវិមាន ឈ្នះ-ឈ្នះ មានតម្លៃជាប្រវត្តិសាស្ត្រ សម្រាប់ប្រជាជនកម្ពុជា។ នាឱកាសនោះដែរ លោក ស៊ុន ចាន់ថុល គូសបញ្ជាក់ អំពីសុខសន្តិភាព ការអភិវឌ្ឍប្រកបដោយចីរភាព និងសមិទ្ធផលនានាដែលសម្រេចបានដ៏ត្រចះត្រចង់ ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ជូនមន្ត្រីរាជការក្រសួងសាធារណការ និងអ្នកស្រុកកោះធំ ដើម្បីបានយល់ដឹង និងយកទៅត្រិះរិះពិចារណា ផ្សព្វផ្សាយបន្ត។ លោកបន្ដថា សុខសន្តិភាព និងស្ថិរភាពនយោបាយ បានផ្តល់លទ្ធភាពឲ្យកម្ពុជា អាចទាក់ទាញវិនិយោគិនបរទេស ភ្ញៀវទេសចរជាតិ និងអន្តរជាតិ ស្វែងរកទីផ្សារសម្រាប់លក់ផលិតផល និងបង្កើតការងារធ្វើជូនប្រជាពលរដ្ឋ ដើម្បីលើកកម្ពស់សេដ្ឋកិច្ចគ្រួសារ និងមានជីវភាពធូរធារសម្បូរសប្បាយដូចសព្វថ្ងៃ។ សូមរំលឹកថា ជោគជ័យនៃនយោបាយ ឈ្នះ-ឈ្នះ របស់សម្ដេចតេជោ ហ៊ុន សែន បានធ្វើឲ្យរបបប្រល័យពូជសាសន៍ប៉ុលពតត្រូវរលំរលាយទាំងស្រុង ទាំងអង្គការចាត់តាំង នយោបាយនិងយោធា ធ្វើឲ្យប្រទេសជាតិទាំងមូលមានសន្តិភាពពេញលេញ មានការឯកភាពជាតិ និងការឯកភាពទឹកដីទាំងស្រុង ចាប់តាំងពីចុងទសវត្សរ៍ឆ្នាំ១៩៩៨មក ៕