ក្នុងជំនួបពិភាក្សាការងារជាមួយគណៈប្រតិភូប្រឹក្សាធុរកិច្ចអង្គកា JCIA ដឹកនាំដោយលោក Takeshi Saito កាលពីថ្ងៃទី២ ខែកក្កដា ឆ្នាំ២០១៩ នៅទីស្ដីកាក្រសួងសាធារណការ និងដឹកជញ្ជូន ឯកឧត្តម តូច ចាន់កុសល រដ្ឋមន្ត្រីស្ដីទី បានស្នើឲ្យអង្គការជប៉ុន JCIA ជួយបណ្ដុះបណ្ដាលមន្ត្រីជំនាញរបស់ក្រសួងសាធារណការ និងដឹកជញ្ជូន ឲ្យមានសមត្ថភាពគ្រប់គ្រាន់ ក្នុងការប្រើប្រាស់ឧបករណ៍ទំនើបសម្រាប់ពិសោធន៍ដី ដែលនឹងធ្វើឲ្យគុណភាពសំណង់ រឹតតែមានគុណភាពថែមទៀត។ ឯកឧត្តមបានថ្លែងបញ្ជាក់ថា ក្រសួងសាធារណការ និងដឹកជញ្ជូន មានតួនាទីយ៉ាងសំខាន់ ក្នុងការសាងសង់ ផ្លូវ ស្ពាន កំពង់ផែ និងហេដ្ឋារចនាសម្ព័ន្ធរូបវ័ន្តជាច្រើនទៀតផងដែរ។ ឯកឧត្តមថា បើមានឧបករណ៍ទំនើបសម្រាប់ពិសោធន៍ដី នោះនឹងធ្វើឲ្យគុណភាពសំណង់ទាំងនោះ រឹតតែមានគុណភាពថែមទៀត។ បន្ថែមពីនេះ ឯកឧត្តមរដ្ឋមន្ត្រីស្ដីទី ក៏បានអំណរគុណចំពោះគណៈប្រតិភូ ដែលមានបំណងមកវិនិយោគលើវិស័យសាធារណការ និងដឹកជញ្ជូននៅកម្ពុជា និងស្នើឲ្យអង្គការ នាំយកឧបករណ៍បច្ចេកទេសទាំងនោះមកកម្ពុជា។ សូមបញ្ជាក់ថា ជំនួបពិភាក្សានេះ ធ្វើឡើងដើម្បីស្ដាប់ការធ្វើបទបង្ហាញរបស់តំណាងអង្គការ JCIA អំពីឧបករណ៍បច្ចេកវិទ្យាសម្រាប់ពិសោធន៍ដី មុននឹងធ្វើការសាងសង់ហេដ្ឋារចនាសម្ព័ន្ធដឹកជញ្ជូន ក៏ដូចជាស្វែងរកសក្ដានុពល និងឱកាសវិនិយោគលើវិស័យសាធារណការ និងដឹកជញ្ជូននៅកម្ពុជា។ ជាងនេះទៅទៀត JCIA គឺជាអង្គការមនុស្សធម៌ មានទីស្នាក់ការនៅជប៉ុន និងបានចុះពិធីសារកិច្ចព្រមព្រៀង ជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងភាពជាដៃគូតាំពីឆ្នាំ១៩៩៦។ JCIA កំពុងបន្តការគាំទ្រដល់មជ្ឈមណ្ឌលអភិវឌ្ឍន៍សង្គម ពោធិ៍សែនជ័យ លើកម្មវិធីបណ្ដុះបណ្ដាលវិជ្ជាជីវៈ ដូចជាកាត់ដេរសម្លៀកបំពាក់ ជួសជុលម៉ូតូ និងម៉ាស៊ីនធុនតូច ជួសជុលទូរទស្សន៍ និងបរិក្ខាអគ្គិសនី កាត់សក់ ជួសជុលទូរសព្ទ បង្រៀនកុំព្យូទ័រ ភាសាអង់គ្លេស ភាសាជប៉ុន សំណង់ និងបដិសណ្ឋារកិច្ចជាដើម៕