(ភ្នំពេញ)៖ នៅថ្ងៃទី២៤ ខែឧសភានេះ ក្រុមការងារមន្ត្រីមន្ទីរសាធារណការ និងក្រុមការងារបច្ចេកទេសរបស់អង្គការ JICA បានចុះពិនិត្យរួចរាល់ហើយ ស្ពានអ្នកលឿង ដែលរងការខូចខាតជាច្រើន។ អ្នកនាំពាក្យក្រសួងសាធារណការ និងដឹកជញ្ជូន លោក ហ៊ាង សុទ្ធាយុត្តិ បានឲ្យដឹងថា ករណីស្ពានអ្នកលឿង តម្រូវឲ្យមានការសិក្សាច្បាស់លាស់ពីទម្រង់បច្ចេកទេស នៃការខូចខាត និងផលប៉ះពាល់ផ្សេងៗ។ ថ្ងៃនេះជំនាញក្រសួងចុះត្រួតពិនិត្យជាមួយជប៉ុនម្តងទៀត គ្រោងជួសជុលក្នុងដើមសប្តាហ៍ក្រោយនេះ។ ជាការកត់សម្គាល់ ក្រោយមានរូបភាពបង្ហាញពីការខូចខាតបង្កាន់ដៃស្ពានត្សឹបាសា ឬស្ពានអ្នកលឿង បានធ្វើឲ្យមានការរិះគន់ចំពោះជនបង្កហេតុនាំឲ្យខូចខាតស្ពាន ដោយមតិខ្លះលើកឡើងថា ស្ពានដែលជាជំនួយជប៉ុនរាប់រយលានដុល្លារជួយដល់កម្ពុជា មិនគួរណា មិនរួមគ្នាថែរក្សា និងប្រយ័ត្នប្រយែង។ គួរជម្រាបថា ស្ពាន​ត្សឹបាសា គឺជា​ស្ពាន​វែង​ជាងគេ​ក្នុង​ប្រទេស​កម្ពុជា ដែល​ឆ្លងកាត់​ទន្លេមេគង្គ​តាម​បណ្តោយ​ផ្លូវជាតិ​លេខ​ ១។ ស្ពាន​នេះ ត្រូវ​បាន​សាងសង់​ឡើង​ក្រោម​ជំនួយ​ឥតសំណង​របស់​ជប៉ុន​ចំនួន ១២៧ ​លាន​ដុល្លារ​អាមេរិក ហើយ​នេះ​គឺជា​ជំនួយ​ឥតសំណង​ដ៏ធំ​បំផុត​របស់​ជប៉ុន​មកកាន់​ប្រទេស​កម្ពុជា​​៕