ភ្នំពេញ៖ មន្ត្រីជាន់ខ្ពស់ក្រសួងសាធារណការនិងដឹកជញ្ជូនមានប្រសាសន៍ថា ការសាងសង់ហេដ្ឋារចនាសម្ព័ន្ធនៅច្រកទ្វារព្រំដែនអន្តរជាតិស្ទឹងបត់ បានណងអៀននឹងជួយជំរុញកំណើនសេដ្ឋកិច្ចនៃប្រទេសកម្ពុជានិងថៃ ក៏ដូចជាមួយបណ្តាប្រទេសនៃមហាអនុតំបន់មេគង្គ។ ថ្លែងក្នុងពិធីបើកការដ្ឋានសាងសង់អគារច្រកទ្វារព្រំដែនអន្តរជាតិស្ទឹងបត់និងផ្លូវតភ្ជាប់ទៅផ្លូវជាតិលេខ៥ កាលពីថ្ងៃទី២២មេសា លោក ទេសរដ្ឋមន្ត្រី ស៊ុនចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនមានប្រសាសន៍ថា« ការស្តារ និងអភិវឌ្ឍហេដ្ឋារចនាសម្ព័ន្ធដឹកជញ្ជូន ដើរតួនាទីយ៉ាងសំខាន់ក្នុងការធ្វើសមាហរណកម្មតភ្ជាប់ផ្ទៃក្នុងប្រទេស និងជាមួយបណ្តាប្រទេសក្នុងតំបន់ និងពិភពលោក។ ការសាងសង់ហេដ្ឋារចនាសម្ព័ន្ធនៅច្រកទ្វារព្រំដែនអន្តរជាតិស្ទឹងបត់-បានណងអៀននាពេលនេះ គឺបានឆ្លុះបញ្ចាំងឱ្យឃើញនូវការយកចិត្តទុកដាក់ខ្ពស់របស់ ថ្នាក់ដឹកនាំរបស់រាជរដ្ឋាភិបាលក្នុងការលើកកម្ពស់ប្រសិទ្ធភាពនៃការធ្វើដំណើរ និងប្រព័ន្ធភស្តុភារកម្ម ដែលនឹងជួយជំរុញកំណើនសេដ្ឋកិច្ច ការផ្លាស់ប្តូរពាណិជ្ជកម្មនិងវិនិយោគ រវាងកម្ពុជា-ថៃ ក៏ដូចជាមួយបណ្តាប្រទេសនៃមហាអនុតំបន់មេគង្គ»។ លោកទេសរដ្ឋមន្ត្រីគូសបញ្ជាក់ថា« បន្ទាប់ពីសាងសង់រួច ហេដ្ឋារចនាសម្ព័ន្ធនៅច្រកទ្វារព្រំដែនអន្តរជាតិស្ទឹងបត់-បានណងអៀននេះ នឹងបម្រើឱ្យការដឹកជញ្ជូនទំនិញ និងការផ្លាស់ប្តូរធុរកិច្ចរវាងប្រទេស ទាំងពីរ។ ច្រកទ្វារព្រំដែនអន្តរជាតិ ប៉ោយប៉ែត-អរញ្ញប្រាថេត នឹងប្រើប្រាស់សម្រាប់តែ ទេសចរណ៍ប៉ុណ្ណោះ។ លើសពីនេះទៅទៀត ហេដ្ឋារចនាសម្ព័ន្ធនៅច្រកទ្វារព្រំដែនអន្តរជាតិថ្មីនេះ នឹងមានលក្ខណៈទំនើបកម្រិតអន្តរជាតិ ដោយត្រៀមឱ្យមានទីតាំងសម្រាប់យន្តការត្រួតពិនិត្យរួមគ្នា ដែលអាចដំណើរការ លើ២៤ម៉ោង មានអគារស្នាក់នៅបណ្តោះអាសន្នសម្រាប់មន្រ្តីគ្រប់ជំនាញទាំងពីរភាគី ប្រើរយៈពេលតែ១០នាទី សម្រាប់ការត្រួតពិនិត្យកុងតឺន័រមួយ និងមានសមត្ថភាពត្រួតពិនិត្យកុងតឺន័រ ប្រមាណ ១០០ ដល់ ៥០០កុងតឺន័រក្នុងថ្ងៃ»។ តាមលោកទេសរដ្ឋមន្ត្រី ដោយសង្កេតឃើញថា ស្ថានភាពនៅច្រកទ្វារព្រំដែនអន្តរជាតិប៉ោយប៉ែត-អរញ្ញប្រថេត មានភាពតូចចង្អៀត មមាញឹក មិនអាចឆ្លើយតបទៅនឹងកំណើនចរាចរណ៍របស់យានយន្តដឹកទំនិញ និងទេសចរណ៍ និងតបតាមការស្នើសុំរបស់រាជរដ្ឋាភិបាលកម្ពុជា នៅក្នុងកិច្ចប្រជុំទ្វេភាគីកម្ពុជា និងថៃ កាលពីថ្ងៃទី១៣ ខែកក្កដា ឆ្នាំ២០១២ នៅខេត្តសៀមរាប ព្រះរាជាណាចក្រកម្ពុជា រាជរដ្ឋាភិបាលថៃក៏បានឯកភាពជាគោលការណ៍ធ្វើការសិក្សានិងអភិវឌ្ឍតំបន់ស្ទឹងបត់ ស្ថិតក្នុងទឹកដីកម្ពុជា និងបានណងអៀន ស្ថិតក្នុងទឹកដីថៃ។ ក្រោមគំនិតផ្តួចផ្តើម និងអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រសួងសាធារណការ និងដឹកជញ្ជូន បានធ្វើការស្នើសុំជាផ្លូវការទៅ ទីភ្នាក់ងារសហប្រតិបត្តិការដើម្បីអភិវឌ្ឍន៍សេដ្ឋកិច្ចនៃប្រទេសជិតខាង ដើម្បីជួយសិក្សាគម្រោងរៀបចំច្រកទ្វារព្រំដែនអន្តរជាតិស្ទឹងបត់-បានណងអៀន និងផ្លូវតភ្ជាប់ទៅផ្លូវជាតិលេខ៥ នៅថ្ងៃទី១៤ ខែវិច្ឆិកា ឆ្នាំ២០១២។ ជាការឆ្លើយតប NEDA បានឯកភាពលើការស្នើសុំរបស់ក្រសួងសាធារណការ និងដឹកជញ្ជូន ដោយបានផ្តល់ភារកិច្ចជូននាយកដ្ឋានហាយវ៉េថៃ និងAsian Engineering Consultants Corp. Ltd (AEC) ចាប់ផ្តើមដំណើរការសិក្សាកាលពីថ្ងៃទី០១ ខែតុលា ឆ្នាំ២០១៣ និងបានបញ្ចប់ការសិក្សានៅថ្ងៃទី១៧ ខែកក្កដា ឆ្នាំ២០១៥ ក្រោមកិច្ចសម្របសម្រួលពី NEDA។ បន្ទាប់ពីបានបង្កើតគណៈកម្មការចម្រុះដើម្បីរៀបចំបើកច្រកទ្វារព្រំដែនអន្តរជាតិ ស្ទឹងបត់-បានណងអៀន នៅឆ្នាំ២០១៤រួចមក ភាគីទាំងពីរបានធ្វើបទបង្ហាញ និង ពិភាក្សាជាច្រើនលើកច្រើនសារលើលក្ខណៈបច្ចេកទេស និងហិរញ្ញវត្ថុ ជាមួយក្រសួងស្ថាប័នពាក់ពន្ធ័ រហូតឈានដល់ការចុះហត្ថលេខាលើកិច្ចព្រមព្រៀងហិរញ្ញប្បទាន ស្តីពី គម្រោងរៀបចំច្រកទ្វារព្រំដែនអន្តរជាតិស្ទឹងបត់-បានណងអៀន និងផ្លូវតភ្ជាប់ទៅផ្លូវជាតិ លេខ៥ រវាងក្រសួងសេដ្ឋកិច្ច និងហិរញ្ញវត្ថុកម្ពុជា និងស្ថាប័ន NEDA នៅថ្ងៃទី១៩ ខែកុម្ភៈ ឆ្នាំ២០១៦ ដែលមានទឹកប្រាក់ចំនួនជាង ៩២៨ លានបាត (Baht) ប្រមាណ ២៦,៤២លានដុល្លារអាមេរិក ដោយត្រូវចំណាយលើការងារសាងសង់ រួមមាន៖ អគារច្រកត្រួតពិនិត្យព្រំដែន និងផ្លូវ (Border Control Facility and Road), សំណង់អគារអន្តេវាសិកដ្ឋាន (Dormitory), ចំណតសម្រាប់ផ្ទេរទំនិញឆ្លងកាត់ “ឃ្លាំង និងទីលានកុងតឺន័រ” (Cross Dock Zone), ការជួសជុល កែលម្អផ្លូវចាស់ (Improvement of Existing Road) និងសំណង់កាត់បន្ថយគ្រោះទឹកជំនន់ (Flooding Mitigation)។ គម្រោងនេះនឹងអនុវត្តការសាងសង់ដោយក្រុមហ៊ុន Fin Technic Co., Ltd និងត្រួតពិនិត្យបច្ចេកទេសសាងសង់ដោយក្រុមហ៊ុនទីប្រឹក្សាបច្ចេកទេស TEAM Consultant Engineering and Management ហើយគ្រោងនឹងប្រើប្រាស់រយៈពេលសាងសង់ចំនួន ២៤ខែ ដោយគិតចាប់ពីខែមេសា ឆ្នាំ២០១៩ តទៅ៕