តាកែវ៖ លោក អ៊ូច ភា អភិបាល នៃគណៈអភិបាល ខេត្តតាកែវ លោក ណុប នី ប្រធានមន្ទីរសាធារណៈការ នឹងដឹកជញ្ជូនខេត្ត នៅថ្ងៃទី៧ ខែមេសា ឆ្នាំ២០១៩ បានអញ្ជើញចុះត្រួតពិនិត្យការចាក់កៅស៊ូប្រភេទ A/C ផ្លូវវាងក្រុងដូនកែវ លេខ២១ ប្រវែង ២៧៩៥ម៉ែត្រ ស្ថិតនៅភូមិថ្នល់បែក ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ ។ ក្នុងឱកាសនោះដែរ លោកអភិបាលខេត្តតាកែវ រួមជាមួយ ប្រធានមន្ទីរសាធារណៈការ និងដឹកជញ្ជូនខេត្ត បានអញ្ជើញចុះត្រួតពិនិត្យទីតាំងប្រារព្ធព្រះរាជពិធីច្រតព្រះនង្គល នាពេលឆាប់ៗខាងមុខនេះ ក្រោមព្រះរាជាធិបតីភាព ព្រះករុណា ព្រះបាទ បរមនាថ នរោត្តម សីហមុនី ព្រះមហាក្សត្រ នៃកម្ពុជា ។ មានប្រសាសន៍នាឱកាសនោះដែរ លោក អ៊ូច ភា អភិបាលខេត្តតាកែវ បានធ្វើការណែនាំដល់ក្រុមជំនាញបច្ចេកទេស របស់មន្ទីរសាធារណៈ នឹងដឹកជញ្ជូនខេត្ត ត្រូវធ្វើការស្ថាបនាផ្លូវ និងរៀបចំទីតាំងប្រារព្ធពិធីនេះប្រកបដោយគុណភាព និងយកចិត្តទុកដាក់ខ្ពស់ចំពោះសុវត្ថិភាពបងប្អូនកំពុងធ្វើដំណើរនៅពេលក្រុមជំនាញកំពុងធ្វើការស្ថាបនា ត្រូវរៀបចំស្លាកសញ្ញា រៀបចំចំណាំងផ្លាតឲ្យបានត្រឹមត្រូវស្របតាមបច្ចេកទេស ដើម្បីបញ្ជៀសការគ្រោះថ្នាក់ដោយប្រការណាមួយ និងស្ថាបនាផ្លូវទាំងនេះមានគុណភាពប្រើប្រាស់យូរអង្វែង។ លោកអភិបាលខេត្ត ក៏បានសំណូមពរដល់អ្នកធ្វើដំណើរឆ្លងកាត់ ជាពិសេសអ្នកដែលរស់នៅជាប់ នឹងគម្រោងដែលត្រូវស្ថាបនានេះ សូមយល់អធ្យាស្រ័យចំពោះផលប៉ះពាល់តិចតួច ដែលកើតមានដោយសារការស្ថាបនាផ្លូវ ហើយសូមតាមដានការលើការស្ថាបនាផ្លូវនេះ បើឃើញមានបញ្ហា ឬភាពមិនប្រក្រតីណាមួយ ត្រូវរាយការណ៍ជូនចៅសង្កាត់ និងមន្ត្រីជំនាញដើម្បីធ្វើការពិនិត្យ និងវាយតម្លៃ ព្រោះនេះគឺដើម្បីបម្រើប្រយោជន៍ ដល់បងប្អូន ដែលអ្នកប្រើប្រាស់ផ្លូវនេះផ្ទាល់ ៕