[Bayon TV] - ក្រុមហ៊ុនសាងសង់ផ្លូវល្បឿនលឿន របស់ចិន នឹងផ្តល់សម្ភារជួសជុលផ្លូវមួយចំនួនដល់រាជរដ្ឋាភិបាលកម្ពុជា
2019-03-21
ទៅកាន់ទំព័រចុះផ្សាយក្នុង Bayon TV
ភ្នំពេញ ៖ តំណាងក្រុមហ៊ុនសាងសង់ផ្លូវដ៏ធំមួយ របស់ចិន បានសន្យាថា នឹងប្រគល់សម្ភារសម្រាប់ជួសជុលផ្លូវថ្នល់មួយចំនួនដល់រាជរដ្ឋាភិបាលកម្ពុជា។
លោក វ៉ឹង កាង (Weng Gang) អនុប្រធានក្រុមហ៊ុនសាជីវកម្មស្ពាន-ថ្នល់ចិន ក្នុងឱកាសដែលសម្ដេចតេជោ បានអនុញ្ញាតឱ្យចូលជួបសំដែងការគួរសម នៅព្រឹកថ្ងៃទី២១ ខែមីនា នេះ បានគោរពថ្លែងអំណរគុណយ៉ាងជ្រាលជ្រៅ ជាទីបំផុត ជូនចំពោះសម្តេចតេជោ ដែលបានគាំទ្រ និងផ្តល់ឱកាសដល់ក្រុមហ៊ុនរបស់លោក បានចូលរួមចំណែក នៃការកសាងហេដ្ឋារចនាសម្ព័ន្ធស្ពានថ្នល់ នៅកម្ពុជា បានរយៈប្រវែងប្រមាណ១ពាន់គីឡូម៉ែត្រមកហើយ។ នៅថ្ងៃស្អែកនេះ ទៀតសោត ក្រុមហ៊ុនរបស់លោក បានទទួលឱកាសសាងសង់ផ្លូវល្បឿនលឿនពីទីក្រុងភ្នំពេញទៅកាន់ទីក្រុងព្រះសីហនុ ហើយគម្រោងនេះ គឺជាគម្រោងធំមួយ ក្នុងចំណោមគម្រោងទាំងឡាយ ដែលក្រុមហ៊ុនរបស់លោកធ្លាប់ធ្វើកន្លងមក។ នេះបើតាមការឱ្យដឹងរបស់ឯកឧត្តម អ៊ាង សុផល្លែត ជំនួយការសម្ដេចតេជោ ហ៊ុន សែន។
ឯកឧត្តម បានដកស្រង់ប្រសាសន៍របស់សម្ដេចតេជោថា ជាការពិតណាស់ ក្រុមហ៊ុន បានធ្វើការសាងសង់ហេដ្ឋា រចនាសម្ព័ន្ធ ជាង១ពាន់គីឡូម៉ែត្រហើយ ហើយនៅថ្ងៃស្អែកនេះ នឹងបន្តពង្រីកការសាងសង់ទៀត គឺការសាងសង់ផ្លូវល្បឿនលឿន ពីរាជធានីភ្នំពេញទៅកាន់ជាយក្រុងព្រះសីហនុ។ សម្តេច បានជម្រាបជូនលោកកាងថា អ្វីដែលសម្ដេចចង់បាននោះ គឺផ្លូវស្ពាន និងហេដ្ឋារចនាសម្ព័ន្ធ ដែលជាការចាំបាច់របស់ប្រជាជនកម្ពុជា៕
