[Thmey Thmey] - ផ្លូវជាតិលេខ៧១c ចំការលើ ទៅត្បូងឃ្មុំ នឹងត្រូវសាងសង់នៅចុងឆ្នាំនេះ
2019-03-14
ទៅកាន់ទំព័រចុះផ្សាយក្នុង Thmey Thmey
រដ្ឋាភិបាលគ្រោងបើកការដ្ឋានសាងសង់ផ្លូវជាតិលេខ៧១c នៅចុងឆ្នាំ២០១៩នេះ។ នេះបើតាមសេចក្ដីជូនដំណឹងនៅលើទំព័រហ្វេសប៊ុករបស់ក្រសួងសាធារណការ និងដឹកជញ្ជូន ដែលធ្វើឡើងបន្ទាប់ពីរដ្ឋមន្ត្រីលោក ស៊ុន ចាន់ថុល បានចុះត្រួតពិនិត្យសិក្សាលទ្ធភាពសាងសង់ផ្លូវមួយនេះនៅថ្ងៃទី១៤ខែកុម្ភៈនេះ។
ផ្លូវជាតិលេខ៧១c មានប្រវែង ១១៤គីឡូម៉ែត្រ ដែលតភ្ជាប់ចេញពីផ្លូវជាតិលេខ៧១ ត្រង់ចំណុចផ្សារចំការលើ ស្រុកចំការលើ ខេត្តកំពង់ចាម ឆ្លងកាត់ស្ពានស្ទឹងត្រង់-ក្រូចឆ្មារ ទៅកាន់ភូមិសាស្ត្រខេត្តត្បូងឃ្មុំ។
ក្រសួងសាធារណការឲ្យដឹងថា គម្រោងសាងសង់ផ្លូវជាតិ៧១C នេះត្រូវបានសិក្សាដោយក្រុមហ៊ុនសៀងហៃ ហើយបច្ចុប្បន្នក្រុមហ៊ុនកំពុងសិក្សាបន្ថែមត្រង់ចំណុចដែលទទួលរងដោយទឹកជំនន់ ដើម្បីរកដំណោះស្រាយធានាគុណភាពខ្ពស់។
គួរបញ្ជាក់ថា សព្វថ្ងៃ ស្ពានឆ្លងទន្លេមេគង្គស្ទឹងត្រង់-ក្រូចឆ្មារ ដែលជាគម្រោងក្រោមកម្ចីរបស់ចិន កំពុងត្រូវបានសាងសង់ ហើយគ្រោងនឹងបញ្ចប់នៅដើមឆ្នាំ២០២១៕
