[KHB Media.Asia] - បណ្ឌិត លឹម សុខតៃ បានរួមចំណែកលើកកម្ពស់វិស័យវិស្វកម្មនៅកម្ពុជា
2019-03-03
ទៅកាន់ទំព័រចុះផ្សាយក្នុង KHB Media.Asia
ភ្នំពេញ៖ បណ្ឌិត លឹម សុខតៃ បច្ចុប្បន្នជាព្រឹទ្ធបុរសនៃមហាវិទ្យាល័យវិទ្យាសាស្រ្ត ផ្នែកវិស្វកម្មស៊ីវិល នៃសាកលវិទ្យាល័យន័រតុន។ លោកក៏ជាអតីតសាស្រ្តាចារ្យម្នាក់ដែលបានបណ្ដុះបណ្ដាលនិស្សិតរាប់ពាន់នាក់លើជំនាញវិស្វកម្ម នៅវិទ្យាស្ថានបច្ចេកវិទ្យាកម្ពុជា (Techno) ផងដែរ។
ក្រៅពីការបង្រៀន និងបំពេញតួនាទីជាព្រឹទ្ធបុរសនៅសាកលវិទ្យាល័យន័រតុន លោកបណ្ឌិតក៏បានទទួលរៀបចំការសិក្សា និងស្ថាបនាគម្រោងជាច្រើននៅក្នុងប្រទេសកម្ពុជា ក្នុងនោះ លោកបានចូលរួមធ្វើការសិក្សាគម្រោងសាងសង់ ផ្លូវល្បឿនលឿនភ្នំពេញា-បាវិត ដែលជាគម្រោងរបស់អង្គការ (JICA) ចូលរួមធ្វើតេស្ដដីសម្រាប់ការស្ថាបនាឡើងវិញនូវគ្រឹះស្ពានជ្រោយចង្វារ សា្ថបនាគម្រោងស្ពានបេតុងទាំងអស់នៅតាមផ្លូវជាតិលេខ២១ ធ្វើតេស្ដដីក្នុងផ្នែកមួយចំនួននៃគម្រោងផ្លូវជាតិលេខ៥ ពីព្រែកក្ដាមដល់ធ្លាយម្អម និងរៀបចំស្ថាបនាគម្រោងគ្រឹះបង្គោលអង់តែនទូរស័ព្ទមួយចំនួន និងទទួលធ្វើតេស្ដដីពីក្រុមហ៊ុនវិស្វកម្មមួយចំនួនទៀតផងដែរ។
ងាកទៅមើលការសិក្សារបស់បណ្ឌិតលឹម សុខតៃ គឺជាសិស្សពូកែផ្នែកគណិតវិទ្យាប្រចាំវិទ្យាល័យបាក់ទូក ចាប់តាំងពីថ្នាក់ទី៧ រហូតដល់ថ្នាក់ទី១១ និងបានបញ្ចប់មធ្យមសិក្សាទុតិយភូមិនៅឆ្នាំ១៩៩៣។ បន្ទាប់មកសិស្សពូកែរូបនេះបានប្រឡងចូលរៀនបន្ដនៅវិទ្យាស្ថានបច្ចេកវិទ្យាកម្ពុជា (សាលាតិចណូ)។ នាពេលនោះ និស្សិតសុខតៃ បានក្លាយជាយុវជនម្នាក់ក្នុងចំណោមយុវជន ៣០នាក់ប៉ុណ្ណោះ ដែលបានប្រឡងជាប់ជាស្ថាពរចូលរៀននៅវិទ្យាស្ថានបច្ចេកវិទ្យាកម្ពុជាជំនាញវិស្វកម្ម។
អំឡុងពេលសិក្សា និស្សិត សុខតៃ បានប្រឡងជាប់ទៅចូលរួមកម្មសិក្សារយៈពេល ២ខែ ជាមួយនិស្សិតបរទេសផ្សេងទៀតនៅទីក្រុង Buaudoux ប្រទេសបារាំង នាឆ្នាំ១៩៩៦។
បន្ទាប់ពីឆ្លងកាត់ ៤ឆ្នាំលើការសិក្សាហើយ ឈានដល់ឆ្នាំទី៥ យុវជនឆ្នើម សុខតៃ បានប្រឡងជាប់ទៅសិក្សា និងបញ្ចប់បរិញ្ញាបត្ររបស់ខ្លួននៅក្នុងប្រទេសប៊ែលហ្សិកជំនាញវារីសាស្រ្ត នៅឆ្នាំ១៩៩៩។ ក្រោយបញ្ចប់ការសិក្សា និងត្រឡប់ចូលមកក្នុងប្រទេសវិញ លោក សុខតៃ ត្រូវបានអញ្ជើញឱ្យចូលបម្រើការងារជាសាស្រ្តាចារ្យ នៅវិទ្យាស្ថានបច្ចេកវិទ្យាកម្ពុជា។
ក្រោយមកទៀត ដោយមានការឧបត្ថម្ភគាំទ្រពីក្រុមសាកលវិទ្យាល័យនិយាយភាសាបារាំង លោក សុខតៃ បានប្រឡងជាប់អាហាររូបករណ៍បន្ដការសិក្សាអនុបណ្ឌិតនៅប្រទេសប៊ែលហ្សិក។ លោកបានបញ្ចប់ការសិក្សាអនុបណ្ឌិតនៅឆ្នាំ២០០១ ជំនាញធរណីបច្ចេកទេស។ បន្ទាប់មកទៀត អ្នកជំនាញផ្នែកវិស្វកម្មរូបនេះក៏បានទទួលអាហារូបករណ៍បន្ដការសិក្សាថ្នាក់បណ្ឌិតផ្នែកធរណីបច្ចេកទេសនៅសាកលវិទ្យាល័យជូឡាឡាំងកន ប្រទេសថៃ។ លោកបានបញ្ចប់ថ្នាក់បណ្ឌិតរបស់លោកនៅឆ្នាំ២០០៩។
ពាក់ព័ន្ធនឹងគុណភាពនៃនិស្សិតវិស្វកម្មនៅក្នុងប្រទេសកម្ពុជាវិញ លោកបណ្ឌិតយល់ឃើញជារួមថា ក្រោយបញ្ចប់ការសិក្សា និស្សិតអាចបំពេញការងារបានស្របតាមតម្រូវការទីផ្សារ។ ប៉ុន្ដែប្រសិនបើប្រៀបធៀបនឹងនិស្សិតក្នុងតំបន់វិញ គឺមាននិស្សិតវិស្វកម្មកម្ពុជាប្រមាណ ២០% ប៉ុណ្ណោះដែលអាចមានសមត្ថភាពក្នុងការប្រកួតប្រជែងបាន។ ក្នុងគោលបំណងដើម្បីពង្រឹងគុណភាពនិស្សិតវិស្វកម្មកម្ពុជា បណ្ឌិតលឹម សុខតៃ គូសបញ្ជាក់ថា សាកលវិទ្យាល័យនៅក្នុងប្រទេសកម្ពុជាគួរតែមានបន្ទប់ពិសោធន៍ឱ្យបានគ្រប់គ្រាន់ និងជំរុញនិស្សិតឱ្យចុះកម្មសិក្សាឱ្យបានកាន់តែច្រើន។ ជាងនេះទៅទៀត និស្សិតចាំបាច់ត្រូវពង្រឹងជំនាញទន់បន្ថែមទៀត។
ជាបំណងប្រាថ្នា លោកលឹម សុខតៃ ចង់ឃើញសមិទ្ធផលសាធារណៈដែលសាងសង់រួចរាល់ហើយមានភាពគង់វង្សយូរអង្វែងស័ក្តិសមនឹងតម្លៃដែលបានចំណាយ។ ជាមួយគ្នានេះ លោកចង់ឱ្យមានការសាងសង់ហេដ្ឋារចនាសម្ព័ន្ធក្រោមដីនៅក្នុងរាជធានីភ្នំពេញ ដោយសារវាអាចប្រើប្រាស់បានយូរ និងផ្ដល់សោភណ្ឌភាពដល់ផ្នែកខាងលើនៃរាជធានី៕
