ពិធីបិទវគ្គបណ្តុះបណ្តាលស្តីពីភាពជាអ្នកដឹកនាំ “Adaptive Leadership: Leading Change for Organizational Renewal” វគ្គទី១ --- ថ្ងៃពុធ ៩កើត ខែមាឃ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៣ ខែកុម្ភៈ ឆ្នាំ២០១៩ ឯកឧត្តម តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្រ្តី ស៊ុន ចាន់ថុល បានអញ្ជើញជាអធិបតីក្នុងពិធីបិទវគ្គបណ្តុះ បណ្ដាលស្តីពីភាពជាអ្នកដឹកនាំ “Adaptive Leadership: Leading Change for Organizational Renewal” វគ្គទី១ ដោយមានការចូលរួមពីថ្នាក់ដឹកនាំ ក្រសួង វាគ្មិន និងសិក្ខាកាមនៃវគ្គបណ្តុះបណ្តាលនេះ។ កម្មវិធីវគ្គបណ្តុះបណ្តាលនេះ សហការរៀបចំឡើងដោយក្រសួងសាធារណការ និងដឹកជញ្ជូន ជាមួយនឹង មជ្ឈមណ្ឌល Center of Asia Leadership Initiatives (CALI) ដែលបានប្រព្រឹត្តទៅចាប់ពីថ្ងៃទី១១ ដល់ ថ្ងៃទី១៣ ខែកុម្ភៈ ឆ្នាំ២០១៩ នៅរាជធានីភ្នំពេញ។ វគ្គបណ្តុះបណ្តាលរយៈពេលបីថ្ងៃនេះ បានផ្តោតលើប្រធានបទសំខាន់ៗមួយចំនួនរួមមាន៖ កត្តាគន្លឹះនៃ ភាពជាអ្នកដឹកនាំទាក់ទងនឹងការអនុវត្តជាក់ស្តែង ការវិភាគអំពីបញ្ហាប្រឈម ការវិភាគអំពីសិទ្ធិអំណាច ក្នុងការធ្វើសេចក្តីសម្រេចចិត្ត និងរួមមានការពិភាក្សាជាក្រុមការងារផងដែរ។ ឯកឧត្ដមរដ្ឋលេខាធិការ បានផ្តាំផ្ញើដល់សិក្ខាកាមទាំងអស់យកចំណេះដឹង បទពិសោធន៍ និងការអនុវត្ត ល្អៗដែលទទួលបានពីកម្មវិធីវគ្គបណ្តុះបណ្តាលនេះទៅប្រើប្រាស់ក្នុងការដឹកនាំអង្គភាពរបស់ខ្លួនឱ្យ សម្រេចបានប្រសិទ្ធភាព និងប្រសិទ្ធផលខ្ពស់ ក៏ដូចជាដើម្បីបម្រើប្រជាពលរដ្ឋយើងប្រកបដោយសេចក្តី ពេញចិត្ត។ ជាទីបញ្ចប់ ឯកឧត្ដមរដ្ឋលេខាធិការ បានអញ្ជើញជាកិត្តិយសប្រគល់វិញ្ញាបនបត្របញ្ចប់វគ្គសិក្សាវគ្គបណ្តុះ បណ្តាលដល់សិក្ខាកាមទាំងអស់ដែលបានបញ្ចប់វគ្គសិក្សាប្រកបដោយជោគជ័យ និងបានថ្លែងអំណរគុណនិងកោតសរសើរយ៉ាងជ្រាលជ្រៅផងដែរដល់វាគ្មិនទាំងអស់ដែលបានខិតខំប្រឹងប្រែងអស់ពីកម្លាំងកាយ និងចិត្តដើម្បីបង្ហាត់បង្ហាញដល់សិក្ខាកាមទាំងអស់ឱ្យទទួលបានលទ្ធផលជាទីគាប់ចិត្តនេះ។