[Raksmey News] - សង្ខេបព័ត៌មានសំខាន់ៗប្រចាំថ្ងៃទី៩ ខែមករា ឆ្នាំ២០១៩
2019-01-09
ទៅកាន់ទំព័រចុះផ្សាយក្នុង Raksmey News
*លិខិតស្នើសុំធ្វើនយោបាយឡើងវិញរបស់លោកគង់ គាំ បានដាក់ទៅក្រសួង មហាផ្ទៃ
ពាក្យស្នើសុំរបស់លោកគង់ គាំ អតីតឧត្តមទីប្រឹក្សាជាន់ខ្ពស់អតីតគណបក្សសង្គ្រោះជាតិ ស្នើសុំសិទ្ធិនយោបាយឡើងវិញបានទៅដាក់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រួចហើយនៅព្រឹកថ្ងៃទី៩ ខែមករា ឆ្នាំ២០១៩ នេះ៕
*ទេសរដ្ឋមន្ដ្រី ប្រកាសថា ឆ្នាំ២០១៩នេះ ក្រុមហ៊ុនកែច្នៃយានយន្ដគ្មានច្បាប់អនុញ្ញាតត្រឹមត្រូវ ត្រូវតែបិទចោលទាំងអស់
ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បាន ប្រកាសថា ក្នុងឆ្នាំ២០១៩នេះ ក្រុមហ៊ុនកែច្នៃយានយន្ដដែលគ្មានច្បាប់ទម្លាប់ត្រឹមត្រូវ ត្រូវតែបិទចោលទាំងអស់ ពីព្រោះក្រសួងបានតែបក់ផ្សែងជាច្រើនឆ្នាំមកហើយ ដោយ សារតែក្រុមហ៊ុនកាត់តកែច្នៃទ្រុងឡាន គ្មានអាជ្ញាបណ្ណត្រឹមត្រូវទាំងនេះ។ការបញ្ជាក់ពីចំណាត់ការរបស់ទេសរដ្ឋមន្ដ្រី បានធ្វើឡើងក្នុងពិធីបើកសន្និបាត បូក សរុបលទ្ធផលការងារ ប្រចាំឆ្នាំ២០១៨ និងលើកទិសដៅការងារឆ្នាំ២០១៩ ដែលនឹងប្រព្រឹត្តទៅនៅទីស្ដីការក្រសួង នៅព្រឹកថ្ងៃទី៩ ខែមករា ឆ្នាំ២០១៩៕
*រដ្ឋមន្ត្រីកសិកម្មស្នើរភាគីថៃអនុវត្តតាមកិច្ចសន្យាក្រោយបោះទុនវិនិយោគរោងចក្រនៅកម្ពុជា
ជំនួបការងារជាមួយក្រុមហ៊ុនថៃដែលវិនិយោគរោងចក្រកែច្នៃដំឡូងមីនៅកម្ពុជារដ្ឋមន្ត្រីក្រសួងកសិកម្មរុក្ខាប្រមាញ់និងនេសាទបានណែនាំឲ្យក្រុមហ៊ុនអនុវត្តនូវផលិតកម្មតាមកិច្ចសន្យានិងសហការជាមួយមន្ត្រីពាក់ព័ន្ធដើម្បីពិភាក្សាពីនីតិវិធីនានាក្នុងការគាំទ្រដល់ការវិនិយោគទទួលបានជោគជ័យ។
ប្រភពពីហ្វេសប៊ុកលើផេករបស់ក្រសួងកសិកម្មរុក្ខាប្រមាញ់និងនេសាទលើកឡើងថាក្នុងជំនួបរវាងលោករដ្ឋមន្ត្រី វេង សាខុន កាលពីរសៀលថ្ងៃទី៨ មករា ឆ្នាំ២០១៩កន្លងទៅ លោក រ៉េនហូវ (Ho Ren Hua) នាយកក្រុមហ៊ុន ធីដាប់ប៊លយូភីស៊ី អ៊ីនវេសមិន ខេមបូឌា (TWPC Investment Cambodia) បានឲ្យដឹងថាក្រុមហ៊ុនលោកមានប្រភពមកពីប្រទេសថៃនិងបានបោះទុនវិនិយោគលើវិស័យកសិ-ឧស្សាហកម្មនៅកម្ពុជាដោយក្រុមហ៊ុនបានទទួលគោលការណ៍បង្កើតរោងចក្រកែច្នៃដំឡូងមីពីក្រសួងឧស្សាហកម្មនិងសិប្បកម្ម តាំងពីចុងឆ្នាំ២០១៧មកម្ល៉េះ៕
*ក្បាលរថភ្លើងថ្មីទំនើបបីគ្រឿង មកដល់កម្ពុជានិងគ្រោងដាក់ដំណើរការក្នុងពេលឆាប់ៗ
ក្បាលរថភ្លើងថ្មីទំនើបចំនួន៣គ្រឿងដែលទិញពីប្រទេសម៊ិកស៊ិក បានមកដល់ក្រុងព្រះសីហនុ និងបានស្ទូចដាក់លើរថភ្លើងទាំងបីគ្រឿងរូចរាល់នៅ ព្រឹកថ្ងៃទី៩ ខែមករា ឆ្នាំ២០១៩ នេះ។ រថភ្លើងស៊េរីទំនើបទាំង៣គ្រឿងនេះបញ្ជាទិញដោយក្រុមហ៊ុន Royal Group របស់អ្នកឧកញ៉ា គិត ម៉េង។ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន នឹងស្នើសុំសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា អញ្ជើញសម្ពោធដាក់ឲ្យប្រើប្រាស់ជាការនូវរថភ្លើងស៊េរីទំនើបចំនួនបីគ្រឿង ទិញពីម៉ិកស៊ិក ដែលទើបដឹកមកដល់កម្ពុជានេះ៕
*ឯកអគ្គរដ្ឋទូតឥណ្ឌូនេស៊ី ៖ទំនាក់ទំនងពាណិជ្ជកម្មរវាងឥណ្ឌូនេស៊ី-កម្ពុជាកើនឡើង១០ភាគរយ
ឯកអគ្គរដ្ឋទូតឥណ្ឌូនេស៊ីប្រចាំនៅកម្ពុជាបានថ្លែងថា បើគិតពីទំហំពាណិជ្ជកម្មរវាងប្រទេសឥណ្ឌូនេស៊ីនិងកម្ពុជារយៈពេល១០ឆ្នាំមកនេះ បានកើន ឡើងប្រមាណ១០ភាគរយ និងដោយឡែកបើគេគិតពីទំហំពាណិជ្ជកម្មរវាងប្រទេសទាំងពីរកាលពីអំឡុងឆ្នាំ២០១៨កន្លងមកនេះ មានទំហំទឹកប្រាក់ជាង៦០០លានដុល្លារអាមេរិក៕
*ភ្ញៀវបរទេសជាង៨០ជាតិសាសន៍មានវត្តមាននៅខេត្តកំពតក្នុងឆ្នាំ២០១៨
ក្នុងចំណោមភ្ញៀវជាងមួយលានប្រាំមួយសែននាក់ដែលមានវត្តមាននៅខេត្តកំពតក្នុងឆ្នាំ២០១៨ ទេសចរបរទេសជាងមួយសែនប្រាំមួយម៉ឺននាក់ មកពីប្រទេសចំនួន៨២ទូទាំងពិភពលោក។លោកសយ ស៊ីណុល ប្រធានមន្ទីរទេសចរណ៍ខេត្តកំពតបានមានប្រសាសន៍ថា ដោយសារប្រទេសជាតិមានសុខសន្តិភាព គួបផ្សំនឹងសក្តានុពលសម្បូរបែបផងនោះ ពីមួយឆ្នាំទៅមួយឆ្នាំសន្ទុះនៃបរិមាណភ្ញៀវចូលមកកម្សាន្តក្នុងខេត្តកំពតតែងកើនឡើងជាលំដាប់៕
*នាវាចម្បាំងកងទព័ជើងទឹកចិនចំនួន៣គ្រឿងបានចូលចតនៅសមុទ្រអន្តរជាតិខេត្តព្រះសីហនុ
ដូចការគ្រោងទុក នាវាចម្បាំងកងទ័ពរំដោះប្រជាជនចិនចំនួន៣គ្រឿង បានចូលមកដល់ខាងមុខខេត្តព្រះសីហនុហើយ នាព្រឹកថ្ងៃ៩មករា២០១៩នេះ ប្រកបដោយសុវត្ថិភាព ក្នុងគោលបំណងទស្សនកិច្ច រឹតចំណងសាមគ្គីភាពឲ្យកាន់តែរឹងមាំ រវាងកងទព័ជើងទឹកចិននិងកម្ពុជា។
ក្នុងដំណើរចូលចតនៅក្រុងព្រះសីហនុ រយៈពេល៤ថ្ងៃ ដោយចាប់ផ្តើមពីថ្ងៃទី៩ខែមករាដល់ថ្ងៃទី១២ ខែមករា ឆ្នាំ២០១៩៕
*ចាប់ផ្ដើមតម្លើងបង្គំកៅអី នៅពហុកីឡដ្ឋាន មរតកតេជោ
លោក ថោង ខុន ប្រធានគណៈកម្មាធិការជាតិ អូឡាំពិកកម្ពុជា បានអញ្ជើញទៅធ្វើជាសាក្សី ក្នុងការតម្លើងបង្គំកៅអី សម្រាប់អង្គុយទស្សនាបាល់ទាត់ ក្នុងពហុកីឡដ្ឋាន មរតកតេជោ កាលពីព្រឹកថ្ងៃទី៩ មករា ២០១៩ នេះ។ ពិធីនេះ ក៏មានការចូលរួម ពីសំណាក់លោក Wang Chun Xian ដែលជាតំណាង ក្រសួងពាណិជ្ជកម្មចិន ទៀតផង ។ សូមបញ្ជាក់ថា បង្គំកៅអីថ្មនេះ មានចំនួន ៤.៦២៤ ដុំ ជណ្ដើរមាន ២.៣៩២ កាំ និង បង្កាន់ដៃ ចំនួន ១៩២ ។ បន្ទាប់ពីចាប់បង្គំបេតុងនេះហើយ ទើបបំពាក់កៅអីជ័រ ដែលអាចផ្ទុកមនុស្ស បានចំនួន ៥៥.០០០ នាក់ និងកៅអីបម្រុង ចំនួន ៥.០០០ កៅអីទៀតផង ។ កីឡដ្ឋាននេះ មានសមត្ថភាពជម្លៀសមនុស្ស ដោយប្រើពេលតែ ៧ នាទីប៉ុណ្ណោះ ៕
