[Kley Kley News] - រដ្ឋមន្រ្តីសាធារណការ ប្ដេជ្ញាបិទយានដ្ឋានកែច្នៃរថយន្ដខុសបច្ចេកទេសឲ្យអស់ក្នុងឆ្នាំ២០១៩
2019-01-10
ទៅកាន់ទំព័រចុះផ្សាយក្នុង Kley Kley News
លោកស៊ុន ចាន់ថុល ទេសរដ្ឋមន្រ្តី រដ្ឋមន្ដ្រីក្រសួងសាធារណការ បានប្ដេជ្ញាបិទយានដ្ឋានកែច្នៃរថយន្ដខុសបច្ចេកទេសឲ្យអស់ក្នុងឆ្នាំ២០១៩នេះ ដើម្បីកាត់បន្ថយការប្រើប្រាស់រថយន្តខុសស្តង់ដារបទដ្ឋានបច្ចេកទេសដែលបង្កគ្រោះថ្នាក់ចរាចរណ៍ និងខូចខាតផ្លូវថ្នល់ជាដើម។ ការថ្លែងនេះធ្វើឡើងក្នុងពិធីបើកសន្និបាតបូកសរុបការងារក្រសួងសាធារណការ និងដឹកជញ្ជូនឆ្នាំ២០១៨ និងលើកទិសដៅការងារឆ្នាំ២០១៩ កាលពីថ្ងៃទី៩ ខែមករា ឆ្នាំ២០១៩។
លោកទេសរដ្ឋមន្រ្តី ថែមទាំងបញ្ជាដល់មន្ត្រីក្រោមឱវាទឲ្យពង្រឹងវិធានការណ៍ចុះត្រួតពិនិត្យកន្លែងកែច្នៃរថយន្ដខុសបច្ចេកទេសនៅតាមរាជធានីខេត្ត-ក្រុងស្រុក-ខណ្ឌផងដែរ។ ការណ៍នេះ ដើម្បីឈានទៅដល់បិទកន្លែងទាំងនោះឲ្យអស់ បន្ទាប់ពីមានហានិភ័យនៃគ្រោះថ្នាក់ចរាចរណ៍លើដងវិថី និងខូចខាតផ្លូវ បណ្តាលមកពីការដឹកលើសទម្ងន់ របស់រថយន្តតទ្រុងខុសលក្ខណៈបច្ចេកទេសជារៀងរាល់ថ្ងៃនោះ។
លោក បញ្ជាក់ថា នៅទូទាំងប្រទេសនៅមានយាន្តដ្ឋានកែច្នៃរថយន្តខុសបច្ចេកទេសរាប់រយកន្លែង ដែលអត់មានច្បាប់ទម្លាប់ ដែលជាក្តីបារម្ភពាក់ព័ន្ធនឹងសុវត្ថិភាពចរាចរណ៍គោក។
លោកបន្តថា ក្នុង១ឆ្នាំៗរាជរដ្ឋាភិបាលបានចំណាយថវិការាប់រយលានដុល្លារ ដើម្បីជួសជុលកែលម្អប្រព័ន្ធហេដ្ឋារចនាសម្ព័ន្ធនៅកម្ពុជា ដែលដើមហេតុដោយសារតែទំនិញលើសទម្ងន់នៃរថយន្តកែច្នៃតទ្រុងសំពីងសំពោង។
យ៉ាងណាក៏ដោយ បើយោងតាមរបាយការណ៍របស់អគ្គលេខាធិការគណៈកម្មាធិការជាតិសុវត្ថិភាពចរាចរណ៍គោក បានឲ្យដឹងថា គិតត្រឹមត្រីមាសទី៣ឆ្នាំ២០១៨ កន្លងមកក្រុមការងារត្រួតពិនិត្យយានយន្ត កែច្នៃខុសលក្ខណៈបច្ចេកទេសថ្នាក់ជាតិ និងថ្នាក់ខេត្ត បានត្រួតពិនិត្យយានយន្តទូទាំងប្រទេសចំនួន ៥៥ ៧៣៧គ្រឿង ក្នុងនោះបានកាត់ទ្រុងចំនួន១៦៦គ្រឿង ដោះរានតក្រោយរថយន្តចំនួន១៨១គ្រឿង និងរថយន្តគ្មានស្លាកលេខចំនួន១២៩គ្រឿង៕
