[Kley Kley News] - រាជរដ្ឋាភិបាល គ្រោងសង់ផ្លូវរថភ្លើងលើអាកាសពី ភ្នំពេញ ទៅ ស្តាតមរតកតេជោ
2018-12-28
ទៅកាន់ទំព័រចុះផ្សាយក្នុង Kley Kley News
លោក ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា ក្រសួងបានស្នើឱ្យអង្គការ JICA សិក្សាពីការសាងសង់រថភ្លើងលើអាកាស (AGT) ពីរាជធានីភ្នំពេញ ទៅពហុកីឡដ្ឋានជាតិមរតកតេជោ ខណៈដែលកម្ពុជា នឹងធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣។ លោកថ្លែងឱ្យដឹងដូច្នេះ ទៅកាន់អ្នកសារព័ត៌មាននៅមុខពហុកីឡដ្ឋានជាតិមរតកតេជោ នាព្រឹកថ្ងៃទី២៨ ខែធ្នូ ឆ្នាំ២០១៨ ក្រោយលោកបានចូលរួមជិះកង់កម្សាន្តមហាជន ដើម្បីអបអរសាទរពិធីសម្ពោធវិមានឈ្នះ ឈ្នះ។
លោកបន្ថែមថា ក្រសួងក៏បានស្នើឱ្យវិស័យឯកជន សិក្សាគម្រោងដឹកជញ្ជូនអ្នកដំណើរតាមរថភ្លើង ពីព្រលានយន្តហោះ ទៅស្ថានីយភ្នំពេញ និងទៅដល់ពហុកីឡដ្ឋានជាតិមរតកតេជោផងដែរ។
បើតាមការលើកឡើងរបស់លោក កាលពីខែមិថុនាកន្លងទៅ គម្រោងស្ថាបនាខ្សែរថភ្លើងលើអាកាសក្នុងរាជធានីភ្នំពេញក្រោមកម្ចីរបស់ជប៉ុនជាង ៨០០លានដុល្លារ គឺត្រូវការពេលវេលាយ៉ាងហោចណាស់ ២ឆ្នាំបន្ថែមទៀត ដើម្បីសិក្សាលម្អិត។ លោកថា ការចំណាយពេលវេលាសិក្សាយូរបែបនេះ គឺដើម្បីឱ្យប្រាកដថា នៅពេលអនុវត្តគម្រោងសាងសង់នេះទៅ គឺមានផលប៉ះពាល់តិចតួចបំផុតដល់ទ្រព្យសម្បត្តិប្រជាពលរដ្ឋ និងសាធារណៈ។
បើតាមគម្រោងរថភ្លើងអាកាស AGTក្នុងរាជធានីភ្នំពេញ ដែលអាជ្ញាធរ និងអ្នកជំនាញ JICA បង្ហាញនាពេលកន្លងមក ឱ្យដឹងថា គម្រោងនេះ មានប្រវែង ១៨គីឡូម៉ែត្រ រត់តាមបណ្តោយមួយចំនួនដូចជា៖ មហាវិថីហ្សាលដឺហ្គោល មហាវិថីព្រះមុនីរ៉េត លេខ ២១៧ វេងស្រេង ឆ្ពោះទៅព្រលានយន្តហោះ និង១ខ្សែទៀតបែកខ្នែងទៅជាតិលេខ៤ និងកប់ស្រូវ៕
