[CTV8] - លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ សាងសង់ស្ថានីយ៍បូមទឹកថ្មីចំនួន៤កន្លែង
2017-09-26
ទៅកាន់ទំព័រចុះផ្សាយក្នុង CTV8
ភ្នំពេញ៖ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងតាមបណ្តាញព័ត៌មានហ្វេសបុកថា ជាទូទៅ ការគណនាគ្រប់ហេដ្ឋារចនាសម្ព័ន្ឋបណ្តាញលូ ស្ថានីយ៍បូមទឹក អណ្តូងលូ ទ្វារទឹក…គឺសម្រាប់តែកម្រិតទឹកភ្លៀងធ្លាក់កំពស់ ៤០មីលីម៉ែត្រក្នុង១ម៉ោង។ លោកថា នៅទីក្រុងអូសាកា ប្រទេសជប៉ុន ការគណនា designed stormwater គឺកម្រិតទឹកភ្លៀង ៤០មីលីម៉ែត្រក្នុង១ម៉ោងប៉ុណ្ណោះ បើភ្លៀងធ្លាក់លើសពី ៤០មីលីម៉ែត្រ ក៏រងការលិចទឹកតាមទីតាំងខ្លះដែរ។ សម្រាប់រាជធានីភ្នំពេញ កាលពីថ្ងៃទី២០ ខែកញ្ញាឆ្នាំ២០១៧ ភ្លៀងធ្លាក់យ៉ាងគំហុករហូតដល់ ១១៦មីលីម៉ែត្រ ក្នុង១ម៉ោងកន្លះ បណ្តាលអោយលិចទឹកតាមទីតាំងមួយចំនួន ប៉ុន្តែដោយសារការកសាងបណ្តាញលូមេថ្មីបានប្រវែង ៤២០គីឡូម៉ែត្រ និងសាងសង់ស្ថានីយ៍បូមទឹកថ្មីចំនួន ៤កន្លែង ធ្វើអោយទឹកភ្លៀងហូរស្រកអស់បានលឿនជាងមុន ៣ដង។ មូលហេតុបណ្ដាលឲ្យទឹកលិច -ទឹកភ្លៀងធ្លាក់ហួសកម្រិត ៤០មីលីម៉ែត្រក្នុង១ម៉ោង គឺកម្រិតនេះ ទីក្រុងប្រទេសណានៅលើពិភពលោក ក៏នឹងរងលិចទឹកដែរចៀសមិនផុត រួមទាំងទីក្រុងអូសាកា ឬទីក្រុងបាងកក ឬទីក្រុងហូជីមិញ…។ -សណ្ឋានដីនៅទីក្រុងភ្នំពេញ ជាតំបន់ទំនាបបាតខ្ទះព័ទ្ឋជុំវិញដោយទំនប់ ហើយរងគំរាមកំហែងដោយទឹកជំនន់ចំនួន ៣ប្រភព៖
១-ជំនន់ដោយទឹកភ្លៀង។ ២-ជំនន់ដោយទឹកទន្លេ។ ជាទូទៅ នៅខែកក្កដា សីហា កញ្ញា តុលា វិច្ឆិកា ទឹកទន្លេឡើងខ្ពស់ព័ទ្ធជុំវិញទីក្រុង ដែលអាចហូរចូលទីក្រុងគឺ ទឹកទន្លេសាប ទន្លេចតុមុខ ទន្លេបាសាក់ ស្ទឹងព្រែកត្នោត បឹងកប់ស្រូវ…ដែលយើងបានបិទទ្វារទឹក ហើយប្រើស្ថានីយ៍បូមទឹក បូមទឹកបញ្ចេញក្រៅទំនប់។ ៣-ជំនន់ពីស្ទឹងព្រែកត្នោត ខេត្តកំពង់ស្ពឺ ខេត្តកណ្តាល។ ទីក្រុងប្រទេសភាគច្រើនលើពិភពលោក វិធីដោះស្រាយទឹកគឺងាយស្រួលដោយគ្រាន់តែបង្ហូរទឹកភ្លៀងចូលបឹង ទន្លេ សមុទ្រ…ជាការស្រេច ខុសពីរាជធានីភ្នំពេញ ត្រូវប្រើស្ថានីយ៍បូមទឹកចំនួន ១៣កន្លែងបូមឆ្លងកាត់ទំនប់បូមបញ្ចេញក្រៅក្រុង។ ក្នុងខែនេះ នីវ៉ូទឹកទន្លេកំពុងខ្ពស់ជាងនីវ៉ូសណ្ឋានដីតាមទីតាំងខ្លះក្នុងទីក្រុង។ -បញ្ហាខ្វះអណ្តូងលូ ការលួចបិទភ្ជិតអណ្តូងលូ សម្រាប់បង្ហូរចូលបំពង់លូ អណ្តូងលូត្រូវមានគម្លាតពី ១០ម៉ែត្រ ទៅ ២០ម៉ែត្រ។ ស្ថានភាពអណ្តូងលូ ចាស់មិនគ្រប់គ្រាន់ បច្ចុប្បន្នយើងមានតែអណ្តូងលូជាង ៤៤.០០០អណ្តូងលូប៉ុណ្ណោះ។ -បញ្ហាខ្វះបណ្តាញលូ នៅទីក្រុងភ្នំពេញ យើងមានបណ្តាញលូថ្មីចាស់ ប្រវែង ៦៦០គីឡូម៉ែត្រ ក្នុងពេលតម្រូវការបណ្តាញលូរហូតដល់ ៣.៦០០គីឡូម៉ែត្រ និងមានប្រឡាយមេចំនួន ១៨ ប្រវែង ៥៦គីឡូម៉ែត្រ ព្រមទាំងប្រឡាយរងចំនួន ១។
-បញ្ហាសំរាមបាំងមុខអណ្តូងលូ ដែលជាឧបសគ្គការបង្ហូរទឹកពីសាច់ថ្នល់ចូលបណ្តាញលូក្រោមដី ។ បញ្ហាសំរាមក្នុងពោះប្រឡាយ បាំងសំរាស់មុខស្ថានីយ៍បូមទឹក បញ្ហាកំណកលាមកក្នុងលូ ប្រឡាយ ក៏ឧបសគ្គផ្លូវទឹកហូរដែរ។ ការរស់នៅរបស់ប្រជាពលរដ្ឋនៅពោះប្រឡាយស្ទឹងមានជ័យ ធ្វើអោយទឹកលិចនៅផ្លូវលេខ ២០០៤ ផ្លូវ ណ័រប្រ៊ីត និងតំបន់ព្រលានយន្តហោះផ្នែកខាងត្បូងនិងខាងកើត។ -ការអភិវឌ្ឍន៍ទីក្រុងលឿនពេក ធ្វើអោយការកសាងបណ្តាញលូមិនគ្រប់គ្រាន់។ កាលពីមុនពេលអភិវឌ្ឍន៍ ទឹកភ្លៀងបានហូរជ្រាបចូលដីឡូតិ៍ ទឹកហូរចូលដីទំនាប កាត់បន្ថយទឹកលិចបានខ្លះ។ ប៉ុន្តែបច្ចុប្បន្ន ការចាក់ដីលុបទំនាប សាងសង់ផ្ទះ ចាក់បេតុងសាប ផ្លូវចាក់បេតុង ចាក់កៅស៊ូ ធ្វើអោយទឹកបង្ហែរមកចូលលូទាំងអស់។ -សមត្ថភាពស្ថានីយ៍បូមទឹកមិនគ្រប់គ្រាន់។ យើងបានស្ថាបនាស្ថានីយ៍បូមទឹកថ្មីចំនួន ៤កន្លែង គឺស្ថានីយ៍បូមទឹកបឹងត្របែក ទួលគោកទី១ ទួលគោកទី២ ព្រះពន្លា…ដែលមានសមត្ថភាពបូមទឹកកើន ៣ដងធៀបនឹងស្ថានីយ៍ចាស់។
ស្ថានីយ៍បុរី ១០០ខ្នង ស្ថានីយ៍លូ ៥កំពុងសាងសង់ ហើយទិសដៅក្នុងឆ្នាំ២០១៨ នឹងសាងសង់ស្ថានីយ៍បន្ថែមនៅ ស្ថានីយ៍បឹងទំពុន និងស្ថានីយ៍ទួលសំពៅ។ ជារួមការរៀបចំបណ្តាញលូក្នុងរាជធានីភ្នំពេញ មានលក្ខណៈស្មុគ្រស្មាញ ប្រើថវិកាច្រើន ទាមទារពេលវេលាយ៉ាងតិច ៨ឆ្នាំក្នុងការកសាងហេដ្ឋារចនាសម្ព័ន្ឋបណ្តាញលូ និងត្រូវមានការចូលរួមពីប្រជាពលរដ្ឋទាំងការគ្រប់គ្រងថែទាំបណ្តាញលូ ទាំងការគ្រប់គ្រងសំរាម។ ជាការសន្និដ្ឋានៈ នៅក្នុងរយៈពេល ៤ឆ្នាំចុងក្រោយនេះ រដ្ឋបាលរាជធានីភ្នំពេញ បានដាក់បណ្តាញលូមេបានប្រវែង ៤២០គីឡូម៉ែត្រ ស្ថានីយ៍បូមទឹកថ្មីចំនួន ៤កន្លែង ដែលអាចកាត់បន្ថយទឹកលិចបាន ៦០% លើទីតាំងធ្លាប់លិចទឹកពីមុនចំនួន ៣២កន្លែងដូចជា មហវិថីហ្សាលដឺហ្គោល ផ្សារអូរឫស្សី ផ្លូវសុខហុក រង្វង់មូលសំពៅមាស ខាងកើតស្តាតអូឡាំពិក មុខវត្តមហាមន្ត្រី ផ្សារទួលទំពូង មុខស្ថានទូតចិន មុខព្រះបរមរាជវាំង មុខពេទ្យកាលម៉ែត្រ រង្វង់មូលផ្សារដើមថ្កូវ មុខសណ្ឋាគារអាំងទែកុងទីណង់តាល់… បានកាត់បន្ថយការលិចលង់ នៅក្នុងខណ្ឌដូនពេញ ៧មករា ទួលគោក ចំការមន និងកំពុងខិតខំបន្តដោះស្រាយបញ្ហាទឹកលិចនេះ។ បើទោះបីភ្លៀងធ្លាក់ខ្លាំងលើសពី ៤០មីលីម៉ែត្រក៏ដោយ ទឹកលិចលើដងផ្លូវបានហូរឆាប់ស្រកអស់លឿនជាងមុន ៕
