កណ្ដាលៈ ក្នុងផែនការសកម្មភាព១០០ថ្ងៃ របស់ក្រសួងសួងសាធារណៈការ និងដឹកជញ្ជូន នៅថ្ងៃទី១៤ខែធ្នូនេះ កំពង់ផែស្វយ័តភ្នំពេញ បានដាក់ឲ្យប្រើប្រាស់ជាផ្លូវការ នូវចំណតផែកុងតឺន័រ LM17 ជំហានទី២ នៃគម្រោងពង្រីកហេដ្ឋារចនាសម្ព័ន្ធរបស់កំពង់ផែស្វយ័តភ្នំពេញ បន្ទាប់ពីជំហានទី១ បានរួចរាល់ហើយ បាននឹងកំពុងធ្វើសកម្មភាពផ្ទុក ផ្ទេរ និងដឹកជញ្ជូនយ៉ាងមមាញឹក។ លោក ហ៊ី បាវី ប្រតិភូរាជរដ្ឋាភិបាល ទទួលបន្ទុកជាអគ្គនាយក កំពង់ផែស្វយ័តភ្នំពេញ បានលើកឡើងថា ឆ្លើយតបនឹងកំណើនកុងតឺន័រឆ្លងកាត់ មានជាបន្តបន្ទាប់ លើសពិសមត្ថភាព ដែលចំណតផែថ្ម TS3 ទើបសម្រេចធ្វើការវិនិយោគចំណតកុងតឺន័រ LM17 ដែលមានទីតាំងនៅភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល លើផ្ទៃដីទំហំ១០ហិកតា ដែលមានសមត្ថភាពផ្ទុកកុងតឺន័រ ចំនួន១៥០.០០០TEUs ក្នុង១ឆ្នាំ ដោយប្រើប្រាស់ទុនវិនិយោគដែលបានមកពីកម្ចីឥណទានរបស់ប្រទេសចិន ក្នុងទឹកប្រាក់ប្រមាណ២៨.៩០០.០០០ដុល្លារ។ មានការសាងសង់ទីលានផ្ទុកកុងតឺន័រ ការបំពាក់រថយន្តស្ទូចលើទីលានប្រភេទ RTG ចំនួន៤គ្រឿង និងរថយន្តដឹកជញ្ជូនចំនួន២៤គ្រឿងផងដែរ។ លោក ហ៊ី បាវី បានបន្តថា ការពង្រីកហេដ្ឋារចនាសម្ព័ន្ធ នៃចំណតកុងតឺន័រ LM17 ជំហានទី២នេះ ដើម្បីឆ្លើយតបនឹងកំណើនកុងតឺន័រឆ្លងកាត់មានជាបន្តបន្ទាប់លើសពីសមត្ថភាពចំណតផែកុងតឺន័រជំហានទី១ ។ កំណើនកុងតឺន័រឆ្លងកាត់ជាមធ្យមប្រចាំឆ្នាំ១៤.៤% ក្នុងរយៈពេល៥ឆ្នាំចុងក្រោយ ២០១៣-២០១៧។ ប្រតិភូរាជរដ្ឋាភិបាលរូបនេះ បានបញ្ជាក់ថា ក្រៅពីគម្រោងទាំងពីនេះ នឹងមានគម្រោងទី៣ ដែលបាននឹងកំពុងរៀបចំអនុវត្តផែនការរយៈពេលវែងជាច្រើនទៀត រួមមាន៖ គម្រោងអភិវឌ្ឍន៍ផែរណបទន្លេបិទ, គម្រោងអភិវឌ្ឍន៍ផែរណបចំនួន២ នៅទន្លេមេគង្គ និងទន្លេបាសាក់,គម្រោងអភិវឌ្ឍន៍ផែទំនិញចាក់ធារ គម្រោងសាងសង់ឃ្លាំងត្រជាក់\ស្ងួត, គម្រោងអភិវឌ្ឍមជ្ឈមណ្ឌលភស្តុភាកម្ម និងគម្រោងអភិវឌ្ឈតំបន់គាំទ្រ កំពង់ផែ ព្រមទាំងគម្រោងស្តារ និងថែទាំផ្លូវនាវាចរណ៍ សំដៅគាំទ្រដល់ការអភិវឌ្ឍ និងរីកចម្រើនប្រកបដោយនីរន្តរភាព នៃអាជីវកម្មកំពង់ផែស្វយ័តភ្នំពេញ។ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូន បានលើកឡើងថា បើទោះជាចំណតកំពង់ផែ LM17ទាំងពីរ មានសមត្ថភាពអាចផ្ទុកកុងតឺន័របាន៣០០.០០០ TEUs ក្នុង១ឆ្នាំ ដែលអាចឆ្លើយតបបានទៅ និងកំណើនកុងតឺន័រយ៉ាងនេះ ក៏ដោយតែស្នើឲ្យកំពង់ផែស្វយ័តភ្នំពេញ គិតគូរឲ្យហើយ អំពី គម្រោងអភិវឌ្ឍចំណតផែកុងតឺន័របន្ទាប់នៅជំហានទី៣។ លោករដ្ឋមន្រ្តី បានរំលឹកថា គម្រោងពង្រីកហេដ្ឋារចនាសម្ព័ន្ធ នៃចំណតផែកុងតឺន័រ LM17 ជំអានទី២នេះដែរ បានប្រើប្រាស់ទុនវិនិយោគផ្ទាល់ខ្លួនរបស់កំពង់ផែ ប្រមាណ៩លានដុល្លារ ដែលបានមកពីមូលនិធិបម្រុងវិនិយោគរបស់កំពង់ផែ រួមទាំងទុនបានមកពីការបោះផ្សាយលក់ភាគហ៊ុនលក់ទីផ្សារមូលប័ត្រផងដែរ។ សូមបញ្ជាក់ថា ក្រសួងសាធារណៈការ និងដឹកជញ្ជូន មានផែនការផ្តោយសំខាន់ លើការអភិវឌ្ឍដឹកជញ្ជូនតាមផ្លូវ គោក ផ្លូវដែក និងផ្លូវទឹក ដើម្បីសម្រួលដល់មធ្យោបាយដឹកជញ្ជូន ទំនិញ ព្រមទាំងធ្វើឲ្យតម្លៃដឹកជញ្ជូន មានភាពប្រកួតប្រជែង ជាមួយនឹងសេវាកម្មលឿនរហ័ស និងកាន់តែមានប្រសិទ្ធភាព ដើម្បីចូលរួមដល់ការអភិវឌ្ឍសេដ្ឋកិច្ចប្រទេសជាតិ៕