ក្រសួងសាធារណការ និងដឹកជញ្ជូន ដែលជាសេនាធិការបស់រាជរដ្ឋាភិបាលកម្ពុជា រួមជាមួយនឹងទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា (JICA) បាននិងកំពុងសិក្សាគម្រោងសាងសង់ស្ពានថ្មីមួយទៀតឆ្លងកាន់ទន្លេមេគង្គ ដោយតភ្ជាប់ពីផ្លូវជាតិលេខ១ ទៅកាន់តំបន់អរិយក្សត្រ (ស្ពានក្ដីតាកុយ-អរិយក្សត្រ)។ ខណៈគម្រោងសាងសង់ស្ពានថ្មីនេះគឺស្ថិតគម្រោងរួមគ្នាជាមួយនឹងការធ្វើឲ្យប្រសើរឡើងវិញនូវកំណាត់ផ្លូវជាតិលេខ១ ផងដែរ។ក្នុងនោះដែរ កាលពីថ្ងៃទី៨ ខែកក្កដា ឆ្នាំ២០២៦ លោក ឈឹម ផល្លា ប្រធាននាយកដ្ឋានផ្លូវថ្នល់ តំណាងក្រសួសាធារណការ និងដឹកជញ្ជូន និងឯកឧត្តម ឯក ឃុនឌឿន អភិបាលរង រាជធានីភ្នំពេញ បានចូលរួមជាសហអធិបតីក្នុងសិក្ខាសាលាស្ដីពី ការផ្សព្វផ្សាយលើកទី២ លើការសិក្សាគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ១ និងសាងសង់ ស្ពានឆ្លងកាត់ទន្លេមេគង្គ ដោយមានការចូលរួមពីតំណាងទីភ្នាក់ងារសហប្រតិបត្តិការ នៃប្រទេសជប៉ុន (JICA) តំណាងក្រសួងសេដ្ឋកិច្ច និងហិរញ្ញវត្ថុ និងតំណាងមន្ទីរ-អង្គភាពពាក់ព័ន្ធផងដែរ។គោលបំណង នៃសិក្ខាសាលានេះ គឺដើម្បីលើកឡើងពីលទ្ធផល ដែលក្រុមការងារបានសិក្សាគម្រោងកន្លងមករួមមាន៖ ១). ការវាយតម្លៃ នៃលទ្ធភាពគម្រោង ២). ការរៀបចំរចនាបទបឋម និងការប៉ាន់ស្មានប្រមាណតម្លៃ ៣). ការរៀបចំរបាយការណ៍សិក្សាវាយតម្លៃហេតុប៉ះពាល់បរិស្ថាន (IESIA) និង ៤). ការសិក្សារៀបចំផែនការសកម្មភាពការតាំងទីលំនៅឡើងវិញ (RAP)។ ក្រោយពីបានពិភាក្សា និងផ្លាស់ប្តូរយោបល់យ៉ាងយកចិត្តទុកដាក់លើគ្រប់ទិដ្ឋភាព អង្គសិក្ខាសាលាបានឯកភាព និងគាំទ្រលើការសិក្សាគម្រោង។សូមជម្រាបថា គម្រោងស្ថាបនាសាងសង់ស្ពានមិត្តភាពកម្ពុជា-ជប៉ុន តភ្ជាប់ពីតំបន់ផ្លូវជាតិលេខ១ រាជធានីភ្នំពេញ ឆ្លងកាត់ទន្លេមេគង្គឆ្ពោះទៅតំបន់ក្រុងអរិយក្សត្រ ខេត្តកណ្តាល ក្រោមហិរញ្ញប្បទានរបស់រដ្ឋាភិបាលជប៉ុន។ យ៉ាងណាមកដល់ពេលនេះ នៅមិនទាន់កំណត់ពេលវេលាបើកការដ្ឋានសាងសង់នៅឡើយនោះទេ៕