កិច្ចប្រជុំបើកដំណើរការ (Kick-off Meeting) ស្តីពីការរៀបចំនីតិវិធីប្រតិបត្តិស្តង់ដារ (SOP) សម្រាប់ការគ្រប់គ្រងវិនិយោគសាធារណៈរបស់ក្រសួងសាធារណការ និងដឹកជញ្ជូន ទីស្តីការក្រសួង៖ នារសៀលថ្ងៃចន្ទ ទី៦ ខែកក្កដា ឆ្នាំ២០២៦ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងឯកឧត្តម ប៉ែន ធីរុង្គ រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ បានអញ្ជើញជាសហប្រធានដឹកនាំកិច្ចប្រជុំដោយផ្ទាល់ និងតាមរយៈវីដេអូពីចម្ងាយ ស្ដីពីការបើកដំណើរការ (Kick-off Meeting) ស្តីពីការរៀបចំនីតិវិធីប្រតិបត្តិស្តង់ដារ (SOP) សម្រាប់ការគ្រប់គ្រងវិនិយោគសាធារណៈរបស់ក្រសួងសាធារណការ និងដឹកជញ្ជូន ក្រោមជំនួយបច្ចេកទេសពីសហភាពអឺរ៉ុប ក្របខ័ណ្ឌ EU4PFM Cambodia ដោយមានការអញ្ជើញចូលរួមពីថ្នាក់ដឹកនាំក្រសួង តំណាងសហភាពអឺរ៉ុបប្រចាំកម្ពុជា ទីប្រឹក្សាបច្ចេកទេស និងលោក លោកស្រី តំណាងអគ្គនាយកដ្ឋានពាក់ព័ន្ធ ព្រមទាំងមន្រី្តជំនាញជាច្រើនរូបផងដែរ។ កិច្ចប្រជុំនេះមានគោលបំណងបើកដំណើរការជាផ្លូវការនៃការរៀបចំនីតិវិធីប្រតិបត្តិស្តង់ដារ (SOP) សម្រាប់ការគ្រប់គ្រងវិនិយោគសាធារណៈរបស់ក្រសួងសាធារណការ និងដឹកជញ្ជូន ព្រមទាំងផ្តល់ការណែនាំដល់ទីប្រឹក្សាបច្ចេកទេស និងក្រុមការងាររបស់ក្រសួងដែលទទួលបន្ទុកសម្របសម្រួលការងារជាមួយអង្គភាពពាក់ព័ន្ធ និងពិនិត្យពិភាក្សាលើវិសាលភាពការងារ ផែនការអនុវត្ត កាលវិភាគការងារ តួនាទី និងភារកិច្ចរបស់ទីប្រឹក្សាបច្ចេកទេស និងក្រុមការងារពាក់ព័ន្ធ ដើម្បីធានាឱ្យការរៀបចំនីតិវិធីប្រតិបត្តិស្តង់ដារ (SOP) នេះមានប្រសិទ្ធភាព ស័ក្ដិសិទ្ធិភាព និងឆ្លើយតបនឹងតម្រូវការជាក់ស្តែងរបស់ក្រសួង ពាក់ព័ន្ធនឹងការងារគ្រប់គ្រងវិនិយោគសាធារណៈ។ លោកជំទាវរដ្ឋលេខាធិការប្រចាំការ បានថ្លែងអំណរគុណសហភាពអឺរ៉ុប និងក្រុមទីប្រឹក្សាបច្ចេកទេស ដែលបានផ្តល់ការគាំទ្រក្នុងការរៀបចំនីតិវិធីប្រតិបត្តិស្តង់ដារ (SOP) នេះ។ ទន្ទឹមនឹងនេះ លោកជំទាវ និងឯកឧត្តមសហប្រធានអង្គប្រជុំក៏បានស្នើឱ្យគ្រប់អង្គភាពពាក់ព័ន្ធបន្តសហការយ៉ាងជិតស្និទ្ធជាមួយក្រុមទីប្រឹក្សាបច្ចេកទេស ដើម្បីធានាឱ្យបានថាការរៀបចំ នីតិវិធីប្រតិបត្តិស្តង់ដារ (SOP) មានភាពគ្រប់ជ្រុងជ្រោយ អាចអនុវត្តបានប្រកបដោយប្រសិទ្ធភាព និងចូលរួមលើកកម្ពស់ការគ្រប់គ្រងវិនិយោគសាធារណៈរបស់ក្រសួងឱ្យកាន់តែមានតម្លាភាព គណនេយ្យភាព និងប្រសិទ្ធភាពខ្ពស់៕