ប្រតិភូនៃអង្គភាពគ្រប់គ្រងគម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងផ្លាស្ទិកនៅកម្ពុជា ធ្វើទស្សនកិច្ចសិក្សាស្វែងយល់អំពីទីលានទុកដាក់សំរាម និងរោងចក្រប្រព្រឹត្តកម្មសំណល់រឹង នៅប្រទេសវៀតណាម វៀតណាម៖ ចាប់ពីថ្ងៃទី២៨ ខែមិថុនា រហូតដល់ថ្ងៃទី៤ ខែកក្កដា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំប្រតិភូនៃសមាសភាពគ្រប់គ្រងគម្រោងទាំង៣ ដើម្បីទស្សនកិច្ចសិក្សាស្វែងយល់អំពីទីលានទុកដាក់សំរាម និងរោងចក្រប្រព្រឹត្តកម្មសំណល់រឹង នៅប្រទេសវៀតណាម ក្នុងក្របខណ្ឌគម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងផ្លាស្ទិកនៅប្រទេសកម្ពុជា(SWaPMIP) ក្រោមហិរញ្ញប្បទានដោយធនាគារពិភពលោក(WB)។ ក្នុងដំណើរបំពេញទស្សនកិច្ចនេះមានការអញ្ជើញចូលរួមដោយ ឯកឧត្តមអនុរដ្ឋលេខាធិការ សមាជិកអង្គភាពគ្រប់គ្រងគម្រោងនៃក្រសួងសាធារណការ និងដឹកជញ្ជូន ក្រសួងមហាផ្ទៃ, ក្រសួងបរិស្ថាន, តំណាងក្រសួងសេដ្ឋកិច្ច និងហិរញ្ញវត្ថុ, តំណាងមន្ទីរសាធារណការ និងដឹកជញ្ជូន និងរដ្ឋបាលថ្នាក់ក្រោមជាតិខេត្តគោលដៅចំនួន៥គឺ ខេត្តសៀមរាប កណ្តាល កំពង់ស្ពឺ បាត់ដំបង និងខេត្តព្រះសីហនុ, តំណាងធនាគារពិភពលោក និងក្រុមការងារទីប្រឹក្សាបច្ចេកទេសគម្រោង(DOHWA) ផងដែរ សរុបចំនួន ៣៨រូប។ គោលបំណងនៃដំណើរបំពេញទស្សនកិច្ចនេះគឺ ដើម្បីធ្វើការសិក្សាស្វែងយល់អំពីបទពិសោធនៃការអនុវត្ត ការប្រតិបត្តិការ និងការថែទាំទីលានទុកដាក់សំរាមប្រកបដោយអនាម័យ និងការកែច្នៃស្តារឡើងវិញនូវសំណល់សំរាម រួមជាមួយនឹងការផលិតថាមពលពីសំណល់ ដែលបាននិងកំពុងដំណើរការយ៉ាងមានប្រសិទ្ធភាពនៅប្រទេសវៀតណាម នាពេលបច្ចុប្បន្ននេះ។ សូមបញ្ជាក់ផងដែរថាទីតាំងដែលប្រតិភូបានចុះធ្វើការសិក្សាស្វែងយល់មានចំនួន៥ទីតាំងគឺ ៖ រោងចក្រប្រព្រឹត្តកម្មសំណល់ T&G Green Energy, មជ្ឈមណ្ឌលប្រព្រឹត្តកម្ម Nam Son, រោងចក្រផលិតជីកំប៉ុស Binh Duong, ទីលានទុកដាក់សំរាមប្រកបដោយអនាម័យ Da Phuoc និងកន្លែងញែកសំរាម Tan My។ ជាលទ្ធផលប្រតិភូក្រុមការងារទទួលបាននូវបទពិសោធជាក់ស្តែងនៅទីតាំងដោយផ្ទាល់បានយ៉ាងល្អប្រសើរ និងសម្រេចបានតាមគោលបំណងដែលបានគ្រោងទុក ដោយរួមបញ្ចូលទាំងចំណេះដឹងថ្មីៗ បច្ចេកវិទ្យា និងគំរូនៃទីលានទុកដាក់សំរាម កន្លែងញែកសំរាម កន្លែងធ្វើជីកំប៉ុស និងប្រព័ន្ធប្រមូល និងការប្រើប្រាស់ឧស្ម័នចេញពីគំនរសំរាម ដើម្បីបំប្លែងទៅជាថាមពលអគ្គិសនីសម្រាប់ប្រើប្រាស់ផងដែរ។ ចំណេះដឹងដែលទទួលបានពីទស្សនកិច្ចនេះ នឹងត្រូវដកស្រង់យកទៅបញ្ចូលក្នុងការរចនាប្លង់លម្អិតនៃហេដ្ឋារចនាសម្ព័ន្ធសម្រាប់គម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងផ្លាស្ទិក នៅក្នុងប្រទេសកម្ពុជា (SWaPMIP) ដើម្បីធានាឱ្យបាននូវការអភិវឌ្ឍប្រកបដោយនិរន្តរភាព សុខុមាលភាពសាធារណៈ និងបរិស្ថានបៃតង៕