"ការចូលរួមរបស់បងប្អូនប្រជាពលរដ្ឋ ក្នុងការតភ្ជាប់បណ្តាញលូទឹកកខ្វក់ឱ្យបានត្រឹមត្រូវ គឺជាការចូលរួមថែរក្សាសុខមាលភាព សោភណ្ឌភាព និងផ្តល់បរិស្ថានល្អ ក្នុងមូលដ្ឋានរស់នៅ និងក្នុងសហគមន៍ " ជាមតិលើកឡើងរបស់ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន ក្នុងពិធីបើកសិក្ខាសាលាឆ្លុះបញ្ចាំង និងដកស្រង់បទពិសោធ ស្តីពី «ការងាររៀបចំនិងគាំទ្រការអនុវត្ត កម្មវិធីលើកកម្ពស់អនាម័យ » គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក នៅក្រុងសៀមរាប ខេត្តសៀមរាប សៀមរាប ៖ នាថ្ងៃសុក្រ ទី២៦ ខែមិថុនា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើក សិក្ខាសាលាឆ្លុះបញ្ចាំង និងដកស្រង់បទពិសោធ ស្តីពី «ការងាររៀបចំនិងគាំទ្រការអនុវត្ត កម្មវិធីលើកកម្ពស់អនាម័យ » គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក ក្រុងសៀមរាប ខេត្តសៀមរាប។ សិក្ខាសាលានេះមានការអញ្ជើញចូលរួមពី លោក លី សារី អភិបាលរងនៃគណៈអភិបាលខេត្ត លោក កូវ ភិរម្យ ប្រធានក្រុមការងារធនាគារពិភពលោកប្រចាំនៅកម្ពុជា ដៃគូរសហការ NIRAS លោកស្រី Dominique Monera-Tabora ប្រធានក្រុមការងារបច្ចេកទេសប្រឹក្សាបច្ចេកទេស ថ្នាក់ដឹកនាំ មន្ត្រីរាជការ មកពី មន្ទីរសាធារណការ និងដឹកជញ្ជូនខេត្តគោលដៅ មានខេត្តសៀមរាប ខេត្តកណ្តាល ពោធិ៍សាត់ និងខេត្តបាត់ដំបង មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត មន្ទីរព័ត៌មាន មន្ទីរអប់រំ យុវជន និងកីឡា មន្ទីរបរិស្ថាន មន្ទីរផែនការ មន្ទីរទេសចរណ៍ មន្ទីរសុខាភិបាល ការិយាល័យសាធារណការ បរិស្ថាន និងអនាម័យក្រុង រួមទាំងសមាជិក សមាជិកាគម្រោង អាជ្ញាធរភូមិ ឃុំ សង្កាត់ បងប្អូនពលរដ្ឋផងដែរ។ គោលបំណងនៃសិក្ខាសាលានេះ ធ្វើឡើងដើម្បី ឆ្លុះបញ្ចាំង បញ្ហាប្រឈម ដកស្រង់ទុកជាមេរៀនបទពិសោធន៍ ស្តីពី «ការងាររៀបចំ និងគាំទ្រការអនុវត្ត កម្មវិធីលើកកម្ពស់អនាម័យ » នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក ដែលបានចែករំលែក បទបង្ហាញសង្ខេបពីកម្មវិធីរបស់គម្រោង វឌ្ឍនភាពអនុវត្តកិច្ចការងារ និងការផ្សព្វផ្សាយ ក្នុងការផ្លាស់ប្តូរឥរិយាបទពលរដ្ឋ ឱ្យមានការចូលរួមនៅតាមមូលដ្ឋាន ក្នុងសហគមន៍។ ឆ្លៀតក្នុងឱ្យកាសនោះផងដែរ ឯកឧត្តមរដ្ឋលេខាធិការ បានពាំនាំប្រសាសន៍ផ្តាំផ្ញើរបស់ ឯកឧត្តមរដ្ឋមន្ត្រី ប៉េង ពោធិ៍នា សួរសុខទុកដល់អង្គពិធីទាំងមូល និងថ្លែងអំណរគុណដល់គ្រប់ដៃគូរសហការគម្រោង មានធនាគារពិភពលោក និងអង្គភាពពាក់ពន្ធជាច្រើនទៀត ដែលតែងចូលរួម សហការជាមួយក្រសួង និងអង្គភាពគម្រោង អនុវត្តកិច្ចការងារទទួលបានលទ្ធផលគួរជាទីមោទក។ ក្នុងនោះដែរ ឯកឧត្តមបានថ្លែងអំណរគុណដល់បងប្អូនប្រជាពលរដ្ឋ ក្នុងការចូលរួមតភ្ជាប់បណ្តាញលូទឹកកខ្វក់ បានត្រឹមត្រូវ ទាំងនោះគឺជាការចូលរួមចំណែកថែរក្សាសុខមាលភាពគ្រួសារ សោភណ្ឌភាព និងផ្តល់បរិស្ថានល្អ ក្នុងមូលដ្ឋានរស់នៅ និងក្នុងសហគមន៍ ផងដែរ៕