សេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់ ត្រូវបានបញ្ជូនមកដល់គណៈកម្មការទី៩ នៃព្រឹទ្ធសភា ដើម្បីផ្ទៀងផ្ទាត់ និងផ្តល់យោបល់បន្ថែម បន្ទាប់ពីរដ្ឋសភាបោះឆ្នោតអនុម័ត ក្នុងសម័យប្រជុំជាវិសាមញ្ញ កាលពីថ្ងៃ២២ ខែមិថុនា ឆ្នាំ២០២៦ វិមានព្រឹទ្ធសភា៖ ព្រឹកថ្ងៃពុធ ទី២៤ ខែមិថុនា ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង តំណាងរាជរដ្ឋាភិបាល ចូលរួមកិច្ចប្រជុំ គណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្រ្ត បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ ដែលហៅកាត់ថា គណៈកម្មការទី៩ នៃព្រឹទ្ធសភា ដើម្បីផ្ទៀងផ្ទាត់ និងផ្តល់យោបល់បន្ថែមលើ “សេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់” ដែលមាន ឯកឧត្តម អ៊ុំ សារិទ្ធ ប្រធានគណៈកម្មការទី៩ ដើម្បីពិនិត្យពិភាក្សា ដោយមានការអញ្ជើញចូលរួមពី ឯកឧត្តម លោកជំទាវ អនុប្រធាន សមាជិក សមាជិកា នៃគណៈកម្មការទី៩ ព្រមទាំងតំណាងគណៈកម្មការជំនាញផ្សេងទៀតនៃព្រឹទ្ធសភា និងមន្ត្រីពាក់ព័ន្ធ។ ជាលទ្ធផលឆ្លងតាមកិច្ចប្រជុំនាថ្ងៃនេះ គណៈកម្មការទី៩ និងគណៈកម្មការជំនាញដ៏ទៃទៀត នៃព្រឹទ្ធសភា បានផ្តល់ធាតុចូលសំខាន់ៗជាច្រើនបន្ថែមទៀត ដើម្បីឱ្យក្រសួងយកទៅអនុវត្តបន្ត និងពេលដែលសេចក្តីព្រាងច្បាប់នេះត្រូវបានអនុម័តដោយព្រះមហាក្សត្រនាពេលខាងមុខ។ សម្រាប់ជំហានបន្ទាប់ “សេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់” នឹងត្រូវដាក់បញ្ចូលក្នុងរបៀបវារៈ នៃកិច្ចប្រជុំពេញអង្គព្រឹទ្ធសភានាពេលឆាប់ៗនេះ៕