ភ្នំពេញៈ ក្រសួងសាធារណការ និងដឹកជញ្ជូនបានជម្រាបជូនប្រជាពលរដ្ឋឱ្យមានការប្រុងប្រយ័ត្នខ្ពស់ក្នុងការធ្វើនាវាចរណ៍នៅចំណុចគ្រឹះស្ពានចាស់ ស្ថិតនៅកៀកនឹងសសរស្ពានមិត្តភាពកម្ពុជា-ជប៉ុន (ស្ពានជ្រោយចង្វារ) បន្ទាប់ពីមានឧបទ្ទវេហតុគ្រោះថ្នាក់លិចសាឡង់មួយនៅទីនោះនាពេលថ្មីៗនេះ។អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ នៃក្រសួងសាធារណការកាលពីថ្ងៃចន្ទ ទី១៦ ខែមិថុនានេះបានជូនដំណឹងដល់ ម្ចាស់នាវា នាវិក និងអ្នកបើកបរនាវាគ្រប់ប្រភេទទាំងអស់ថា កាលពីថ្ងៃទី១១ ខែមិថុនា ឆ្នាំ២០២៦ មានករណីគ្រោះថ្នាក់នាវាចរណ៍១ករណីបានកើតឡើងនៅកៀកនឹងសសរស្ពានមិត្តភាពកម្ពុជា-ជប៉ុន (ស្ពានជ្រោយចង្វារ) ដែលបណ្តាលឱ្យសាឡង់១គ្រឿងបានទៅលិច នៅចម្ងាយប្រហែល៥០០ម៉ែត្រខាងជើងស្ពាន។ដើម្បីធានាសុវត្ថិភាព និរន្តរភាពនៃការធ្វើនាវាចរណ៍ និងបញ្ចៀសគ្រោះថ្នាក់ជាយថាហេតុដែលអាចកើត ឡើងជាថ្មីម្តងទៀត អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានចុះពិនិត្យទីតាំងគ្រោះថ្នាក់ និង បានដាក់ពោងសញ្ញាគ្រោះថ្នាក់ថ្មីនៅទីតាំងគ្រោះថ្នាក់ត្រង់ចំណុចទីតាំងដែលសាឡង់បានលិច។ បន្ថែមពីនោះ ក៏បានធ្វើការកំណត់គន្លងនាវាចរណ៍សម្រាប់ផ្លូវនាវាចរណ៍ឱ្យមានសុវត្ថិភាពផងដែរ។ អគ្គនាយកដ្ឋានបានអំពាវនាវដល់ម្ចាស់នាវា នាវិក និងអ្នកបើកបរនាវាគ្រប់ប្រភេទទាំងអស់ ដែលត្រូវធ្វើដំណើរឆ្លងកាត់តំបន់នោះ បង្កើនការប្រុងប្រយ័ត្នខ្ពស់ ពិនិត្យមើលពោងសញ្ញាគ្រោះថ្នាក់ថ្មីឱ្យបាន ច្បាស់លាស់ បើកបរតាមគន្លងនាវាចរណ៍ឱ្យបានត្រឹមត្រូវ និងចៀសវាងការធ្វើនាវាចរណ៍ចូលកៀកតំបន់គ្រោះថ្នាក់នេះជាដាច់ខាត ដើម្បីបញ្ចៀសគ្រោះថ្នាក់នាវាចរណ៍ដែលអាចកើតមានជាយថាហេតុ៕