(ព្រះវិហារ)៖ លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានថ្លែងអំពាវនាវដល់មន្ត្រីរាជការ បុគ្គលិក កម្មករ-ថែទាំផ្លូវថ្នល់ទាំងអស់ ឱ្យរួមគ្នាប្រយុទ្ធប្រឆាំងគ្រឿងញៀន និងបង្ការការឆ្លងមេរោគអេដស៍ ដោយចាត់ទុកការផ្សព្វផ្សាយអប់រំជា «ខែលការពារដ៏រឹងមាំ» សម្រាប់អនាគតរបស់បុគ្គល គ្រួសារ និងសង្គមជាតិទាំងមូល។ ការថ្លែងលើកឡើងរបស់លោក សំ លាងទ្រី ក្នុងឱកាសដែលលោកអញ្ជើញចូលរួមក្នុងកម្មវិធីផ្សព្វផ្សាយបទបញ្ជាលេខ ០១ បប និង ០២ បប របស់រាជរដ្ឋាភិបាល ព្រមទាំងការអប់រំចំណេះដឹងស្តីពីមេរោគអេដស៍ ជំងឺអេដស៍ និងផលប៉ះពាល់នៃគ្រឿងញៀន ដែលរៀបចំធ្វើឡើងនៅសាលប្រជុំរបស់មន្ទីរក្រោមអធិបតីភាពលោក សេន ស៊ីហ៊ត់ រដ្ឋលេខាធិការ និងជាប្រធានគណៈកម្មាធិការប្រយុទ្ធនឹងជំងឺអេដស៍ នៃក្រសួងសាធារណការ និងដឹកជញ្ជូន និងលោក ម៉ា ស៊ុនហួត លោក ប៉ាតទ្រី ប៉ាស់ស្តាន អនុរដ្ឋលេខាធិការក្រសួងសាធារណការ និងដឹកជញ្ជូន។ លោក សំ លាងទ្រី បានថ្លែងថា វត្តមានរបស់ថ្នាក់ដឹកនាំក្រសួងសាធារណការ និងដឹកជញ្ជូននាពេលនេះ បានបង្ហាញពីការយកចិត្តទុកដាក់ខ្ពស់ចំពោះសុខភាព និងសុខុមាលភាពរបស់មន្ត្រីរាជការ និងបងប្អូនកម្មករនៅតាមការដ្ឋាន ដែលជាកម្លាំងស្នូលក្នុងការអភិវឌ្ឍហេដ្ឋារចនាសម្ព័ន្ធរូបវន្តនៅក្នុងខេត្ត។ លោកប្រធានមន្ទីរបានថ្លែងបញ្ជាក់ទៀតថា មន្ទីរសាធារណការ និងដឹកជញ្ជូនខេត្តព្រះវិហារ បានខិតខំអនុវត្តការងារផ្សព្វផ្សាយ និងអប់រំជាបន្តបន្ទាប់ តាមរយៈការបញ្ជ្រាបសារអប់រំស្តីពីការបង្ការជំងឺអេដស៍ និងគ្រឿងញៀន ទៅក្នុងវគ្គបណ្តុះបណ្តាលបណ្ណបើកបរ ការផ្សព្វផ្សាយច្បាប់ចរាចរណ៍ផ្លូវគោក ការអប់រំនៅទីតាំងផ្តល់សេវាត្រួតពិនិត្យលក្ខណៈបច្ចេកទេសយានយន្ត (ឆៀក) ការក្រើនរំលឹកផ្ទៃក្នុង និងយុទ្ធនាការអប់រំក្នុងឱកាសបុណ្យជាតិ ផ្សេងៗ។ជាលទ្ធផល មន្ទីរបានរៀបចំយុទ្ធនាការផ្សព្វផ្សាយចំនួន ២៤ លើក ដោយមានអ្នកចូលរួមសរុប ៥,១៦៩នាក់ ក្នុងនោះស្ត្រីចំនួន ១,៥២៣នាក់។ ទន្ទឹមនឹងលទ្ធផលវិជ្ជមាន លោក សំ លាងទ្រី ក៏បានថ្លែងលើកឡើងពីបញ្ហាប្រឈមមួយចំនួនសម្រាប់ការផ្សព្វផ្សាយ ព្រមទាំងហានិភ័យខ្ពស់របស់ក្រុមកម្មករ ជួសជុល និងថែទាំផ្លូវថ្នល់ ដែលត្រូវធ្វើការនៅតាមការដ្ឋានចល័ត និងតំបន់ដាច់ស្រយាល ងាយប្រឈមនឹងបញ្ហាគ្រឿងញៀន និងការឆ្លងមេរោគអេដស៍។ មួយគ្នានេះ លោក សំ លាងទ្រី បានថ្លែងអំពាវនាវឱ្យមន្ត្រីរាជការ និងបងប្អូនកម្មករទាំងអស់ ត្រូវខិតខំសិក្សាស្វែងយល់ពីចំណេះដឹងដែលទទួលបានពីកម្មវិធីផ្សព្វផ្សាយ និងចៀសវាងដាច់ខាតពីគ្រឿងញៀន បារីអេឡិចត្រូនិក (Vape/E-Cigarette) ស៊ីស្សា និងសារធាតុញៀនគ្រប់ប្រភេទ ព្រមទាំងចូលរួមធ្វើជាអ្នកផ្សព្វផ្សាយបន្តដល់ក្រុមគ្រួសារ និងសហគមន៍ ដើម្បីរួមចំណែកកសាងសង្គមមួយប្រកបដោយសុខភាពល្អ សុវត្ថិភាព៕