ភ្នំពេញ៖ ផ្លូវខ្នែងចំនួន៥២ខ្សែ តភ្ជាប់ផ្លូវជាតិលេខ៦ និងផ្លូវ១១ខ្សែ គ្រោងចំណាយថវិកាប្រមាណ១៥លានដុល្លារ នឹងត្រូវសាងសង់ក្នុងពេលឆាប់ៗ ដើម្បីផ្លាស់ប្តូរមុខមាត់ ខេត្តសៀមរាបឱ្យស័ក្កិសមជាខេត្តទេសចរណ៍មួយយ៉ាងសំខាន់។នេះបើតាមក្រសួងសាធារណៈការនិងដឹកជញ្ជូន។ បើតាមក្រសួងសាធារណៈការនិងដឹកជញ្ជូន ក្នុងកិច្ចប្រជុំស្តីពីការងារជួសជុលនិងថែទាំផ្លូវថ្នល់ក្នុងខេត្តសៀមរាបកាលពីថ្ងៃទី៦វិច្ឆិកាបានឱ្យដឹងថា កិច្ចប្រជុំនេះ​រៀបចំឡើងដើម្បីពិភាក្សារកនីតិវិធីក្នុងការស្តារផ្លូវថ្នល់ដែលខូចខាតទ្រុឌទ្រោមដោយកត្តា ផ្សេងៗ ពិសេស ការដឹកជញ្ជូនលើសទម្ងន់កម្រិតកំណត់ សំដៅធា​នាឱ្យការគ្រប់គ្រងផ្លូវថ្នល់មាន ប្រសិទ្ធភាពខ្ពស់ និងឆ្លើយតបទៅនឹងកំណើនប្រជាជន កំណើនភ្ញៀវទេសចរជាតិ និងអន្តរជាតិនៅក្នុងខេត្តនេះ។ ក្នុងឱកាសនោះលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការនិងដឹកជញ្ជូនបានស្នើឱ្យមន្ទីរ និងភាគីពាក់ព័ន្ធកែសម្រួលនីតិវិធីជួសជុលផ្លូវ ដើម្បីស្តារ កសាង និងជួសជុលថែទាំបណ្តាញផ្លូវថ្នល់នានាឱ្យបានល្អជាងមុន ដើម្បីបំពេញតម្រូវការរបស់ប្រជាពលរដ្ឋ ដែលជាម្ចាស់ឆ្នោត និងបា​នសំណូម​ពរឱ្យធ្វើរបាយការណ៍រួមមួយដាក់ជូនរាជរដ្ឋាភិបាលស្នើសុំថវិកា ប្រមាណ១៥លានដុល្លារសហរដ្ឋអាមេរិក ដើម្បីសាងសង់ផ្លូវខ្នែងចំនួន៥២ខ្សែ តភ្ជាប់ផ្លូវជាតិ​លេខ៦ និងផ្លូវ ១១ខ្សែទៀតក្នុងខេត្តសៀមរាប ឱ្យបានឆាប់តាមដែលធ្វើទៅបាន៕