ក្រសួងសាធារណការ និងដឹកជញ្ជូន ណែនាំពីការប្រើប្រាស់ភ្លើង «ហ្វា» ឲ្យបានត្រឹមត្រូវ ដើម្បីបង្កើនសុវត្ថិភាពចរាចរណ៍ (ភ្នំពេញ)៖ ឯកឧត្ដម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានមានប្រសាសន៍នៅថ្ងៃទី១៧ ខែឧសភា ឆ្នាំ២០២៦ ថា ថ្មីៗនេះ មានបងប្អូនអ្នកដំណើរជាច្រើនបានលើកឡើង និងធ្វើការពិភាក្សាគ្នាពាក់ព័ន្ធនឹងការធ្វើចរាចរណ៍លើដងផ្លូវ ដោយអ្នកបើកបរមួយចំនួនបានប្រើប្រាស់ភ្លើងបំភ្លឺ «ហ្វា» មិនបានត្រឹមត្រូវ ដែលអាចបង្កឲ្យមានគ្រោះថ្នាក់ និងរំខានដល់អ្នកធ្វើដំណើរដទៃ។ ឯកឧត្ដម បានបញ្ជាក់ថា ការប្រើប្រាស់ភ្លើង «ហ្វា» ឲ្យបានត្រឹមត្រូវ គឺមានសារៈសំខាន់ខ្លាំងក្នុងការចូលរួមថែរក្សាសុវត្ថិភាពចរាចរណ៍ និងកាត់បន្ថយហានិភ័យគ្រោះថ្នាក់នៅពេលធ្វើដំណើរពេលយប់។ យោងតាមការណែនាំរបស់ក្រសួង ការប្រើប្រាស់ភ្លើង «ហ្វា» ត្រឹមត្រូវ មានដូចខាងក្រោម៖ *ត្រូវប្រើប្រាស់ភ្លើងហ្វា នៅពេលបើកបរពេលយប់លើដងផ្លូវដែលគ្មានភ្លើងអគ្គិសនីបំភ្លឺ ដើម្បីអាចមើលឃើញផ្លូវខាងមុខបានឆ្ងាយ ប៉ុន្តែត្រូវប្រុងប្រយ័ត្ន កុំឲ្យប៉ះពាល់ ឬរំខានដល់អ្នកបើកបរដែលធ្វើដំណើរមកពីទិសផ្ទុយ។ *ហាមបើកភ្លើងហ្វា នៅក្នុងទីក្រុង ឬទីប្រជុំជន ដែលមានភ្លើងបំភ្លឺគ្រប់គ្រាន់ លើកលែងតែករណីប្រើសម្រាប់ផ្តល់សញ្ញាសុំជែង ឬសុំបើកផ្លូវ ដោយប្រើឆ្លាស់គ្នាជាមួយភ្លើងកូត។ *នៅពេលជួបយានជំនិះមកពីទិសផ្ទុយ ក្នុងចម្ងាយប្រមាណ ១៥០ម៉ែត្រ អ្នកបើកបរត្រូវទម្លាក់ពីភ្លើងហ្វា មកប្រើភ្លើងកូតវិញ ដើម្បីជៀសវាងការចាំងភ្នែកអ្នកដទៃ។ ក្នុងករណីបើកបរតាមពីក្រោយយានជំនិះផ្សេងទៀត ក្នុងចម្ងាយប្រមាណ ១០០ម៉ែត្រ ក៏ត្រូវទម្លាក់ភ្លើងហ្វាមកប្រើភ្លើងកូតផងដែរ។ ក្រសួងសាធារណការ និងដឹកជញ្ជូន ក៏បានអំពាវនាវដល់អ្នកប្រើប្រាស់ផ្លូវទាំងអស់ ឲ្យចូលរួមគោរពច្បាប់ចរាចរណ៍ និងប្រើប្រាស់ភ្លើងបំភ្លឺឲ្យបានត្រឹមត្រូវ ដើម្បីធានាសុវត្ថិភាពរួម និងកាត់បន្ថយគ្រោះថ្នាក់ចរាចរណ៍នៅលើដងផ្លូវ។