ការស្ថាបនាផ្លូវក្រវាត់ព្រំដែនមិនត្រឹមតែបម្រើឱ្យវិស័យការពារជាតិ និងសេដ្ឋកិច្ចប៉ុណ្ណោះទេ ប៉ុន្តែវាក៏បានក្លាយជា «ឆ្អឹងខ្នងទេសចរណ៍ថ្មី» ដ៏មានសារៈសំខាន់បំផុតសម្រាប់ខេត្តមណ្ឌលគិរី ខេត្តមណ្ឌលគិរី មិនត្រឹមតែជាតំបន់សម្រាប់សម្រាកកាយប៉ុណ្ណោះទេ ប៉ុន្តែជាខេត្តគំរូដែលបង្ហាញពីការអភិវឌ្ឍសេដ្ឋកិច្ច ដើរទន្ទឹមគ្នានឹងការអភិរក្ស។ ការប្ដេជ្ញាចិត្តរបស់អាជ្ញាធរក្នុងការថែរក្សាផ្លូវថ្នល់ និងការការពារធនធានធម្មជាតិទាំងនៅក្នុងតំបន់ស្នូល និងតាមបណ្ដោយព្រំដែន នឹងធ្វើឱ្យខេត្តនេះបន្តក្លាយជាដង្ហើមសេដ្ឋកិច្ចទេសចរណ៍ដ៏រឹងមាំ និងមានភាពទាក់ទាញបំផុតសម្រាប់កម្ពុជានាពេលអនាគត។ ខ្សែផ្លូវក្រវាត់ព្រំដែន មានទីតាំងស្រស់ស្អាតលាក់ខ្លួនជាច្រើន ជាពិសេសវាលស្មៅខៀវស្រងាត់ដាច់កន្ទុយភ្នែក និងជួរភ្នំសម្បូរព្រៃឈើវែងអន្លាយ ដែលផ្ដល់ឱកាសសម្រាប់ការរៀបចំកម្សាន្តបែបផ្សងព្រេង (Adventure Tourism) ដូចជាការជិះកង់ភ្នំ ការធ្វើដំណើរកម្សាន្តតាមម៉ូតូធំ និងការបោះតង់តាមកំពូលភ្នំ ដែលសុទ្ធសឹងជាផលិតផលទេសចរណ៍ថ្មី បន្ថែមលើតំបន់ទឹកធ្លាក់ និងវប្បធម៌ជនជាតិដើមភាគតិចដែលមានស្រាប់។ ខ្សែផ្លូវដ៏មានសារៈសំខាន់នេះ នឹងតភ្ជាប់ពីតំបន់ទេសចរណ៍សំខាន់ៗ ទៅកាន់ភូមិកររបស់បងប្អូនជនជាតិដើមភាគតិចតាមព្រំដែន ដែលអនុញ្ញាតឱ្យភ្ញៀវទេសចរអាចស្វែងយល់ពីវប្បធម៌រស់នៅបានយ៉ាងជិតស្និទ្ធ។ ការកើនឡើងនៃចរន្តភ្ញៀវទេសចរតាមតំបន់ព្រំដែន នឹងជំរុញឱ្យមានការបង្កើតសេវាកម្មស្នាក់នៅ អាហារដ្ឋាន និងការលក់ដូរផលិតផលកសិកម្មក្នុងស្រុក ដែលជាការបង្កើតការងារ និងចំណូលដោយផ្ទាល់ដល់ប្រជាពលរដ្ឋនៅតាមតំបន់ដាច់ស្រយាល៕ ប្រភពរូបភាពពី៖ កណ្ដៀរ | ២៥រាជធានី-ខេត្ត | មន្ទីរទេសចរណ៍ខេត្តមណ្ឌលគិរី អត្ថបទ៖ ខ្លីខ្លឹមដេលី