វគ្គបណ្តុះបណ្តាលស្តីពី ការលើកកម្ពស់ចំណេះដឹងផ្នែកនគរូបនីយកម្ម ដើម្បីការអភិវឌ្ឍប្រកបដោយចីរភាព (Leveraging Urban Knowledge Toward Sustainable Development) នៅទីក្រុងឡុងដ៍ ចក្រភពអង់គ្លេស ទីក្រុងឡុងដ៍៖ កាលពីថ្ងៃទី២០ ដល់ថ្ងៃទី២៤ ខែមេសា ឆ្នាំ២០២៦ លោក សួន និមល អគ្គនាយករងនៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន បានអញ្ជើញចូលរួមក្នុងវគ្គបណ្តុះបណ្តាលក្រោមប្រធានបទ ការលើកកម្ពស់ចំណេះដឹងផ្នែកនគរូបនីយកម្ម ដើម្បីការអភិវឌ្ឍប្រកបដោយចីរភាព (Leveraging Urban Knowledge Toward Sustainable Development) ដែលត្រូវបានរៀបចំឡើងក្នុងគោលបំណងផ្លាស់ប្តូរ និងចែករំលែកបទពិសោធន៍លើចំណុចសំខាន់ៗចំនួន ៥ រួមមាន៖ (១) ការលើកកម្ពស់សន្តិសុខសុវត្ថិភាពទឹក (២) ការកែលម្អសេវាកម្មផ្គត់ផ្គង់ទឹកស្អាត (៣) ការរៀបចំផែនការហេដ្ឋារចនាសម្ព័ន្ធទីក្រុង (៤) ការដោះស្រាយបញ្ហាប្រឈមនានាក្នុងវិស័យទឹកស្អាត និងទឹកកខ្វក់ និង (៥) ការស្វែងយល់ពីបទពិសោធន៍បណ្តាប្រទេសនានា ក្នុងការអភិវឌ្ឍទីក្រុងក្រោមលក្ខខណ្ឌថវិកាមានកម្រិត។ វគ្គបណ្តុះបណ្តាលនេះ ក៏ជាឱកាសដ៏វិសេសវិសាលក្នុងការនាំយកចំណេះដឹង និងបច្ចេកវិទ្យាទំនើបៗ ដើម្បីយកមកអនុវត្តក្នុងការអភិវឌ្ឍប្រព័ន្ធចម្រោះទឹកកខ្វក់ និងហេដ្ឋារចនាសម្ព័ន្ធនៅកម្ពុជាឱ្យកាន់តែប្រសើរឡើង ព្រមទាំងចូលរួមចំណែកយ៉ាងសំខាន់ ក្នុងការរឹតចំណងកិច្ចសហប្រតិបត្តិការរវាងកម្ពុជា និងចក្រភពអង់គ្លេស ឱ្យកាន់តែស្អិតរមួតបន្ថែមទៀត៕