«ស្ពានគីហ្សូណា» ជាស្ពានឆ្លងកាត់ទន្លេមេគង្គដំបូងគេនៅកម្ពុជា ដែលបានក្លាយជានិមិត្តរូបប្រវត្តិសាស្ត្រសំខាន់មួយរបស់ ខេត្តកំពង់ចាម ហើយក៏ជាសញ្ញាបង្ហាញពីការរីកចម្រើនផ្នែកហេដ្ឋារចនាសម្ព័ន្ធរបស់ប្រទេស ក្រោយសង្គ្រាមបានបញ្ចប់។ យោងតាមសៀវភៅ «តំបន់ទេសចរណ៍ នៃព្រះរាជាណាចក្រកម្ពុជា» ស្ពាននេះត្រូវបានស្ថាបនាឡើងដោយមានជំនួយថវិកាពីរដ្ឋាភិបាលជប៉ុន ប្រវែងជាង ១គីឡូម៉ែត្រ ហើយត្រូវបានគេចាត់ទុកថាជាស្ពានវែងជាងគេមួយនៅកម្ពុជានាពេលនោះ។ គម្រោងស្ពាននេះ ចាប់ផ្តើមសាងសង់នៅឆ្នាំ១៩៩៨ ក្នុងបរិបទដែលកម្ពុជាកំពុងស្តារប្រទេសជាតិឡើងវិញ ក្រោយសង្គ្រាម ខណៈជាពេលដែលត្រូវការអភិវឌ្ឍន៍ហេដ្ឋារចនាសម្ព័ន្ធជាចាំបាច់នៅពេលនោះ។ បន្ទាប់ពីការខិតខំប្រឹងប្រែងអស់រយៈពេលប្រមាណ ៣ឆ្នាំ ស្ពាននេះត្រូវបានសាងសង់រួចរាល់ និងបើកសម្ភោធប្រើប្រាស់ជាផ្លូវការនៅឆ្នាំ២០០១ ហើយបានក្លាយជាសរសៃឈាមសេដ្ឋកិច្ចសំខាន់ សម្រាប់ការដឹកជញ្ជូន និងការតភ្ជាប់តំបន់កណ្ដាលទៅភាគឦសាន។ ក្រសួងសាធារណការ និងដឹកជញ្ជូន បានឱ្យដឹងដែរថាឈ្មោះ «គីហ្សូណា» មានន័យថា «ចងចិត្ត» ដែលបង្ហាញពីការរឹតបន្តឹងចំណងមិត្តភាពរវាងប្រជាជនកម្ពុជា និងប្រជាជនជប៉ុន៕