កំណាត់ផ្លូវជាតិលេខ២៣ ប្រវែង ១៩,៨៣ គីឡូម៉ែត្រ ពីគល់ស្ពានកោះធំ ដល់ស្រុកលើកដែក ខេត្តកណ្តាល ត្រូវបានសម្ពោធបើកឱ្យប្រើប្រាស់ជាផ្លូវការ នៅព្រឹកថ្ងៃទី២៧ ខែមេសា ឆ្នាំ២០២៦។ ពិធីសម្ពោធមានការអញ្ជើញចូលរួមពីឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ក្រោមអធិបតីភាពឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី និងរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។ ផ្លូវថ្មីនេះមានទទឹង ១១ម៉ែត្រ ប្រភេទកៅស៊ូ AC កម្រាស់ ៨សង់ទីម៉ែត្រ មានគន្លងទៅ-មក សម្រាប់រថយន្ត និងទោចក្រយាន។ គម្រោងរួមបញ្ចូលស្ពានចំនួន៣ ការដាក់លូ ការបំពាក់អំពូលសូឡា LED និងផ្លាកសញ្ញាតាមបទដ្ឋានបច្ចេកទេស ដើម្បីធានាសុវត្ថិភាពចរាចរណ៍។