សន្និសីទអ្នកវិនិយោគ សម្រាប់គម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ (SHV-LC) ខេត្តព្រះសីហនុ៖ នាថ្ងៃទី២៣ ខែមីនា ឆ្នាំ២០២៦ ឯកឧត្តម ហេង ណន រដ្ឋលេខាធិការ នៃក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន និងឯកឧត្តម មាស សុខសេនសាន រដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ អញ្ជើញថ្លែងសន្ទរកថាបើកសន្និសីទអ្នកវិនិយោគសម្រាប់គម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ (SHV-LC) ដោយមានការអញ្ជើញចូលរួមពី ឯកឧត្តម ឡុង ឌីម៉ង់ អភិបាលរង នៃគណៈអភិបាលខេត្តព្រះសីហនុ និង លោកស្រី Towfiqua Hoque តំណាងស្ថាប័នសាជីវកម្មហិរញ្ញវត្ថុអន្តរជាតិ, ថ្នាក់ដឹកនាំក្រសួងសាធារណការ និងដឹកញ្ជូន ក្រសួងសេដ្ឋកិច្ច និងហិរញ្ញវត្ថុ កំពង់ផែស្វយ័តក្រុងព្រះសីហនុ និងមន្ត្រីជំនាញពាក់ព័ន្ធនៃក្រសួងទាំងពីរ។ សន្និសីទនេះ ត្រូវបានរៀបចំឡើងក្រោមការសហការរៀបចំរបស់ក្រសួងសាធារណការ និងដឹកជញ្ជូន, ក្រសួងសេដ្ឋកិច្ច និងហិរញ្ញវត្ថុ, និង ស្ថាប័នសាជីវកម្មហិរញ្ញវត្ថុអន្តរជាតិ ក្នុងគោលបំណង៖ (១) បង្ហាញនូវសក្ដានុពល និងភាពទាក់ទាញរបស់គម្រោង SHV-LC ដល់អ្នកវិនិយោគដែលមានសក្តានុពល កម្រិតអន្តរជាតិ, (២) បង្កើតកិច្ចសហការយុទ្ធសាស្ត្រកម្រិតខ្ពស់ជាមួយអ្នកវិនិយោគជាតិ និងអន្តរជាតិ, និង (៣) ស្វែងយល់ និងប្រមូលមតិយោបល់ពីសំណាក់អ្នកវិនិយោគជាតិ និងអន្តរជាតិ។ សន្និសីទនេះ បានប្រមូលផ្តុំបណ្ដាក្រុមហ៊ុនជាតិ និងអន្តរជាតិ ជាច្រើន ដើម្បីពិភាក្សាអំពីកាលានុវត្តភាពនៃការវិនិយោគ, និងទិសដៅគោលដៅនយោបាយ របស់រដ្ឋាភិបាលក្នុងការគាំទ្រលើការអភិវឌ្ឍន៍គម្រោងមជ្ឈមណ្ឌលភស្តុភារកម្មក្រុងព្រះសីហនុ (SHV-LC) នេះ។ គួរបញ្ជាក់ផងដែរថា សន្និសីទនេះត្រូវបានរៀបចំឡើងម្ដងរួចហើយ កាលពីថ្ងៃទី១៦-១៧ ខែមីនា ឆ្នាំ២០២៦ នៅប្រទេសសិង្ហបុរី៕