ភ្នំពេញ៖ ចាប់ពីថ្ងៃទី១០មីនាតទៅ ការធ្វើចរាចររបស់រថយន្តធុនធ្ងន់គ្រប់ប្រភេទ នៅលើកំណាត់ផ្លូវ ខេត្តលេខ ៣៧១(ឆ្លូង-រកាខ្នុរ)នឹងត្រូវផ្អាកដោយសារការរុះរើស្ពានដែកបេឡេត៍ព្រែកសំរោងចេញ ដើម្បីសាងសង់ជាស្ពានបេតុងថ្មីជំនួសវិញ។មន្ទីរសាធារណការ និងដឹកជញ្ជូនខេត្តក្រចេះ ពន្យល់ថា ការសម្រេចផ្អាកការចរាចររបស់រថយន្តធុន ធ្ងន់ ព្រោះស្ថានភាពផ្លូវវាងការដ្ឋានសាងសង់ស្ពាននេះ ជាផ្លូវលំក្រាលដីល្បាយថ្ម ប្រវែង៤គីឡូម៉ែត្រ មានទទឹងតូច និងគ្រឹះមិនរឹងមាំ។ ក្រៅពីកង់-ម៉ូតូ ស្ថានភាពផ្លូវវាងនេះ អំណោយផលតែចំពោះ រថយន្តលក្ខណៈគ្រួសារ រថយន្តដឹកទំនិញធុនតូចទម្ងន់ក្រោម១៥តោនប៉ុណ្ណោះ។ «បើរថយន្តធុនធ្ងន់ ដែលលើកពី១៥តោន ឆ្លងកាត់ផ្លូវវាងខាងលើ អាចបណ្តាលឱ្យកកស្ទះចរាចរ និង ធ្វើឱ្យស្រុតខូចខាតតួផ្លូវ។»។ នេះជាការបារម្ភរបស់មន្ទីរសាធារណការក្រចេះ ដែលបន្តប្រាប់ឱ្យរថយន្តធុនធ្ងន់ដែលដឹកទំនិញចេញ-ចូលខេត្តក្រចេះ បង្វែរទិសធ្វើចរាចរទៅតាមផ្លូវ ជាតិលេខ៧៣ (ឆ្លូង-ប្រធាតុ)។ ចំពោះការបើកបរវាងផ្លូវសម្រាប់រថយន្តធុនធ្ងន់ នឹងអនុញ្ញាតវិញ ក្រោយការដ្ឋានស្ពានបេតុង សរសៃដែកព្រែកសំរោងថ្មី ដែលមានប្រវែង១៨ម៉ែត្រ ទទឹក១០ម៉ែត្រ ស្ថាបនារួច៕