វេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីគោលនយោបាយ និងយុទ្ធសាស្ដ្របញ្ចកោណ ដំណាក់កាលទី១ នីតិកាលទី៧ នៃរដ្ឋសភា នៅស្រុកអូររាំង មណ្ឌលគិរី៖ នាព្រឹកថ្ងៃសុក្រ ទី១៣ ខែកុម្ភៈ ឆ្នាំ២០២៦ នៅសាលាសហគមន៍ពូរ៉ាង ភូមិពូរ៉ាង ឃុំសែនមនោរម្យ បានរៀបចំវេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីគោលនយោបាយ និងយុទ្ធសាស្ដ្របញ្ចកោណ ដំណាក់កាលទី១ នីតិកាលទី៧ នៃរដ្ឋសភា ក្រោមអធិបតីភាព ឯកឧត្តម ជា ជុន អនុរដ្ឋលេខាធិការក្រសួងសាធារណការ និងដឹកជញ្ជូន និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកអូររាំង និង លោក ហ៊ាញ ប៊ុណ្ណា អភិបាលរងខេត្តមណ្ឌលគិរី និងក្រុមការងារថ្នាក់ខេត្តចុះមូលដ្ឋានស្រុកអូររាំង ដោយមានការអញ្ជើញចូលរួមពីសំណាក់ លោក សៀក មុន្នី អភិបាលស្រុកអូររាំង លោក ឌុន សុខា ប្រធានក្រុមប្រឹក្សាស្រុកអូររាំង លោក លោកស្រី អភិបាលរងស្រុកអូររាំង កងកម្លាំងប្រដាប់អាវុធទាំងបីប្រភេទ លោក លោកស្រីប្រធាន-អនុប្រធានមន្ទីរអង្គភាពជុំវិញខេត្ត អាជ្ញាធរមូលដ្ឋាន មន្ត្រីជំនាញ និងប្រជាពលរដ្ឋជាច្រើនរូប។ វេទិកានេះត្រូវបានរៀបចំឡើង ដើម្បីឱ្យប្រជាពលរដ្ឋលលើកជាមតិយោបល់ បញ្ហាប្រឈម សំណើ សំណូមពរនានារបស់ប្រជាពលរដ្ឋនៅមូលដ្ឋាន ដើម្បីរួមគ្នាសិក្សា ដោះស្រាយបញ្ហាជូនប្រជាពលរដ្ឋឱ្យបានទាន់ពេលវេលា និងរាយការណ៍ជូនរាជរដ្ឋាភិបាល ក្នុងការរៀបចំផែនការយុទ្ធសាស្ត្រអភិវឌ្ឍន៍មូលដ្ឋានឱ្យបានសមស្របតាមតម្រូវការជាក់ស្ដែងរបស់ប្រជាពលរដ្ឋ។ ជាក់ស្ដែងក្នុងអង្គវេទិកានេះផងដែរប្រជាពលរដ្ឋបានលើកឡើងសំណើសុំជួសជុលធ្វើផ្លូវ២០០ម៉ែត្រ ជួសជុលស្ពាន ស្ដារទំនប់ទឹក និងស្នើសុំមន្រ្តីជំនាញចុះចាក់វ៉ាក់សាំងសត្វគោ ក្របី និងសុំពន្លឿនការចុះបញ្ជីដីសហគមន៍។ ទាក់ទងនឹងបញ្ហាខាងលើនេះ ត្រូវបានមន្រ្តីជំនាញនីមួយៗ បានធ្វើការកត់ត្រាទុក និងបានស្រាយបំភ្លឺជូន ហើយបញ្ហាមួយចំនួនទៀត ត្រូវបានធ្វើរបាយការណ៍ដាក់ជូនថ្នាក់ដឹកនាំខេត្ត ក៏ដូចជាក្រសួងស្ថាប័ននានា ដើម្បីពិនិត្យ និងដោះស្រាយជូននៅពេលក្រោយ៕