ភ្នំពេញ ៖ ឯកឧត្តម សេន ស៊ីហ៊ត់ រដ្ឋលេខាធិការក្រសួងសាធារណការ និងដឹកជញ្ជូន និងប្រធានគណៈកម្មាធិការប្រយុទ្ធនឹងជំងឺអេដស៍ និងគ្រឿងញៀន បានអំពាវនាវឱ្យបុគ្គលិក និងកម្មករ នៅចំណតផែកុងតឺន័រLM17 នៃកំពង់ផែស្វយ័តភ្នំពេញ ចូលរួមគោរពច្បាប់ស្តីពីចរាចរណ៍ផ្លូវគោក ជៀសឱ្យឆ្ងាយពីគ្រឿងញៀន និងចូលរួមការពារទប់ស្កាត់ការចម្លងមេរោគអេដស៍និងជំងឺអេដស៍។ ឯកឧត្តម សេន ស៊ីហ៊ត់ រដ្ឋលេខាធិការក្រសួងសាធារណការ និងដឹកជញ្ជូន និងប្រធានគណៈកម្មាធិការប្រយុទ្ធនឹងជំងឺអេដស៍ និងគ្រឿងញៀន បានសហការជាមួយ អង្គការមូលនិធិថែទាំសុខភាពអ្នកជំងឺអេដស៍នៅកម្ពុជា(AHF) បានចុះអប់រំផ្សព្វផ្សាយអំពីវិធីការពារទប់ស្កាត់ការចម្លងមេរោគអេដស៍ និងជំងឺអេដស៍ និងផលប៉ះពាល់បណ្តាលមកពីការប្រើប្រាស់គ្រឿងញៀន និងការចូលរួមគោរពច្បាប់ស្តីពីចរាចរណ៍ផ្លូវគោក ដល់មន្ត្រីរាជការ បុគ្គលិក និងកម្មករ បម្រើការងារនៅចំណតផែកុងតឺន័រLM17 នៃកំពង់ផែស្វយ័តភ្នំពេញ តាមបណ្តោយផ្លូវជាតិលេខ១ ស្រុកកៀនស្វាយ ខេត្តកណ្តាល។ ឯកឧត្តមបានមានប្រសាសន៍ថា ការចុះផ្សព្វផ្សាយនេះ គឺធ្វើឡើងដើម្បីជាការក្រើនរំឮកដល់ មន្ត្រីរាជការ បុគ្គលិក និងកម្មករ បម្រើការនៅនៅចំណតផែកុងតឺន័រLM17 នៃកំពង់ផែស្វយ័តភ្នំពេញ ត្រូវមានការចូលរួម ការពារទប់ស្កាត់ការចម្លងមេរោគអេដស៍ និងជំងឺអេដស៍ ជៀសផុតពីការប្រើប្រាស់គ្រឿងញៀន និងជាការពញ្ញាក់ស្មារតីអោយមានការប្រុងប្រយ័ត្នបានខ្ពស់ ចំពោះបញ្ហាការធ្វើដំណើរទៅគ្រប់ទីកន្លែង មានស្មារតីទទួលខុសត្រូវ រក្សាសុខសុវត្ថិភាព ជាចំណែកក្នុងការចូលរួមកាត់បន្ថយគ្រោះថ្នាក់ចរាចរណ៍ ទាំងអស់គ្នា។ ឯកឧត្តមរដ្ឋលេខាធិការ បានអំពាវនាវ សូមឱ្យមានការចូលរួមគោរពអនុវត្តទាំងអស់គ្នា គឺត្រូវជៀសឱ្យឆ្ងាយពីគ្រឿងញៀន ចូលរួមការពារទប់ស្កាត់ការចម្លងមេរោគអេដស៍ និងជំងឺអេដស៍ និងត្រូវគោរពច្បាប់ស្តីពីចរាចរណ៍ផ្លូវគោក គ្រប់ៗគ្នា។ សូមបញ្ជាក់ថា នៅឆ្នាំ២០២៤ មានការឆ្លងមេរោគអេដស៍ថ្មី នៃក្រុមយុវវ័យ ដែលមានអាយុពី១៥ឆ្នាំ ទៅ២៤ឆ្នាំ មានចំនួន ១ ២០០នាក់ តួលេខនេះមានការកើនឡើង ដោយសារខ្វះការស្វែងយល់អំពីហានិភ័យនៃមេរោគអេដស៍ និងជំងឺអេដស៍ រួមទាំងការថយចុះក្នុងការប្រើប្រាស់ស្រោមអនាម័យ៥០% ក្នុងចំណោមប្រជាជនគន្លឹះ និងក្រុមយុវវ័យ។ យោងរបាយការណ៍នៅត្រីមាសទី៣ ឆ្នាំ២០២៥ របស់អាជ្ញាធរជាតិប្រយុទ្ធ និងជំងឺអេដស៍ បង្ហាញចំនួនប៉ាន់ស្មានអ្នករស់នៅជាមួយមេរោគអេដស៍ ចំនួន៧៦ ០០០នាក់ ជាអ្នកផ្ទុកមេរោគអេដស៍ បានទទួលព្យាបាលដោយឱសថប្រឆាំងមេរោគអេដស៍ ចំនួន ៧១ ៧១៦នាក់ នៅតាមសេវាព្យាបាល ៧៤កន្លែងទូទាំងប្រទេស និងបានទទួលបណ្ណមូលនិធិសមធម៌សុខាភិបាល (ម.ស.ស) ចំនួន ៥៣ ៨២១នាក់ ស្មើ ប្រមាណ ៧៥% តាមមូលដ្ឋានសុខាភិបាលនៅទូទាំង២៥រាជធានី-ខេត្ត។ ជាមួយនោះដែរតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន ប្រចាំនព្វមាស (៩ខែ) ឆ្នាំ២០២៥ ទិន្នន័យនៃអ្នកញៀនគ្រឿងញៀន ចំនួន ២៩ ៣៧០នាក់។ ចំពោះបញ្ហាគ្រោះថ្នាក់ចរាចរណ៍ តែងតែកើតឡើងនៅលើដងផ្លូវ ជាមធ្យម ស្លាប់ ៤នាក់ និងរបួសធ្ងន់ ស្រាល ប្រមាណ១០នាក់ ជារៀងរាល់ថ្ងៃ៕