កិច្ចប្រជុំបូកសរុបលទ្ធផលការងារនៃការអភិវឌ្ឍ "ប្រព័ន្ធវិក្កយបត្រឌីជីថល (MPWT Digital Invoice)" សម្រាប់សេវាសាធារណៈ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ នាព្រឹកថ្ងៃព្រហស្បតិ៍ ទី១២ ខែកុម្ភៈ ឆ្នាំ២០២៦ ឯកឧត្តម នឹម សុធា អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំបូកសរុបលទ្ធផលការងារ នៃការអភិវឌ្ឍ "ប្រព័ន្ធវិក្កយបត្រឌីជីថល (MPWT Digital Invoice)" សម្រាប់សេវាសាធារណៈ របស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីឯកឧត្ដមអគ្គនាយក លោក-លោកស្រី អគ្គនាយករង ប្រធាននាយកដ្ឋាន អនុប្រធាននាយកដ្ឋាន តំណាងអគ្គនាយកដ្ឋានពាក់ព័ន្ធ និងមន្ត្រីជំនាញបច្ចេកទេស។ កិច្ចប្រជុំនេះ រៀបចំឡើងក្នុងគោលបំណង ដើម្បីពិនិត្យវឌ្ឍនភាព និងបូកសរុបលទ្ធផលការងារ នៃការអភិវឌ្ឍប្រព័ន្ធវិក្កយបត្រឌីជីថល (MPWT Digital Invoice)" សម្រាប់សេវាសាធារណៈ របស់ក្រសួងសាធារណការ និងដឹកជញ្ជូន ក្នុងការលើកកម្ពស់ប្រសិទ្ធភាព និងភាពរហ័សទាន់ចិត្ត តាមរយៈការធ្វើឌីជីថលូបនីយកម្ម ដើម្បីពង្រឹងគុណភាព និងពង្រីកវិសាលភាពនៃការផ្តល់សេវាសាធារណៈជូនប្រជាពលរដ្ឋឱ្យកាន់តែប្រសើរឡើង។ ក្នុងឱកាសនោះដែរ ឯកឧត្ដមអនុរដ្ឋលេខាធិការ ប្រធានអង្គប្រជុំ បានសម្ដែងសេចក្ដីសោមនស្សរីករាយ និងសូមកោតសរសើរយ៉ាងខ្លាំង ចំពោះក្រុមការងារជំនាញ នៃអគ្គនាយកដ្ឋានពាក់ព័ន្ធ ដែលបានខិតខំប្រឹងប្រែងសហការលើការអភិវឌ្ឍ "ប្រព័ន្ធវិក្កយបត្រឌីជីថល (MPWT Digital Invoice)" សម្រាប់សេវាសាធារណៈនេះឡើង រហូតសម្រេចលទ្ធផលការងារតាមការគ្រោងទុក ព្រមទាំងបានណែនាំឱ្យបន្តនីតិវិធីស្នើសុំគោលការណ៍ថ្នាក់ដឹកនាំក្រសួង ពិនិត្យ និងដាក់ដំណើរការប្រើប្រាស់សាកល្បង ក្នុងពេលឆាប់ៗខាងមុខនេះផងដែរ៕