ភ្នំពេញ៖ ពេញមួយឆ្នាំ២០២៥ ក្រសួងសាធារណការ និងដឹកជញ្ជូន បានចេញបណ្ណបើកបរម៉ូតូ និងរថយន្ត ចំនួន ១២៥ ៧៩៧បណ្ណ និងរកចំណូលបាន ៥ ៩៩៥លានរៀល ស្មើប្រមាណ ១,៤ លានដុល្លារ។ នេះបើតាមរបាយការណ៍របស់ក្រសួងសាធារណការ។បណ្ណបើកបរទោចក្រយានយន្តចំនួន ១៤ ០៧៤បណ្ណ និងរថយន្ត ចំនួន ១១១ ៧២៣បណ្ណ ត្រូវបានក្រសួងសាធារណការ និងដឹកជញ្ជូន ផ្ដល់ដល់អ្នកបើកបរ។ បើតាមក្រសួងសាធារណការ ចំនួននេះ កើនឡើង ១២,៨៦ភាគរយបើធៀបនឹងឆ្នាំ២០២៤។ ចំណែកចំណូលពីការផ្ដល់បណ្ណបើកបរគ្រប់ប្រភេទវិញ ក្រសួងសាធារណការ រកបាន ៥ ៩៩៥លានរៀល ដែលស្មើប្រមាណ ១,៤លានដុល្លារ ខណៈឆ្នាំ២០២៤ រកបានត្រឹម ៤ ៧៨៤លានរៀលប៉ុណ្ណោះ។ សូម បញ្ជាក់ថា ចាប់ពីឆ្នាំ១៩៩០ ដល់ឆ្នាំ២០២៥ ក្រសួងសាធារណការ បានចេញបណ្ណបើកបរសរុប ១ ៩៨៤ ៧៣៨បណ្ណ ក្នុងនោះម៉ូតូចំនួន ២៧៤ ៣៩៤បណ្ណ និងរថយន្តគ្រប់ប្រភេទចំនួន ១ ៧១០ ៣៤៤បណ្ណ៕