ចុះពិនិត្យវឌ្ឍនភាពការងារស្ថាបនាស្ពានស្ទឹងឆ្វេង(ក្នុងដំណាក់កាលទី២) លើកំណាត់ផ្លូវខេត្តលេខ២៦០អា កំពង់ចាម៖ នាថ្ងៃចន្ទ ទី៩ ខែកុម្ភៈ ឆ្នាំ២០២៦ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារបច្ចេកទេស ចុះពិនិត្យការងារស្ថាបនាស្ពានស្ទឹងឆ្វេង(ក្នុងដំណាក់កាលទី២) ប្រវែង៨៤ម៉ែត្រ ទទឹង១០ម៉ែត្រ លើកំណាត់ផ្លូវខេត្តលេខ២៦០អា ស្ថិតក្នុងឃុំច្បារអំពៅ ស្រុកបាធាយ និងឃុំព្រែកកុយ ស្រុកកងមាស ខេត្តកំពង់ចាម ដែលអនុវត្តការងារដោយមន្ទីរសាធារណការ និងដឹកជញ្ជូនខេត្តកំពង់ចាម។ ក្នុងដំណើរបំពេញបេសកកម្មនេះក៏មានការអញ្ជើញចូលរួមពី ថ្នាក់ដឹកនាំក្រសួងដែលទទួលបន្ទុកបច្ចេកទេស សមាជិក-សមាជិកាគម្រោង អនុប្រធានមន្ទីរសាធារណការ និងដឹកជញ្ជូនខេត្តកំពង់ចាម និងមន្ត្រីបច្ចេកទេសពាក់ព័ន្ធមួយចំនួនផងដែរ។ ការចុះត្រួតពិនិត្យនេះ ធ្វើឡើងក្នុងគោលបំណង ដើម្បីចុះពិនិត្យវឌ្ឍនភាពការងារនៅការដ្ឋាន និងប្រជុំពិភាក្សា ក៏ដូចជាណែនាំបន្ថែមលើការងារបច្ចេកទេសមួយចំនួន សំដៅពង្រឹងគុណភាពសំណង់ស្របតាមបទដ្ឋានបច្ចេកទេសរបស់ក្រសួង ដែលបានធ្វើបច្ចុប្បន្នភាពកន្លងមក និងពន្លឿនការងារស្របតាមផែនការដែលបានគ្រោងទុក៕