ភ្នំពេញ ៖ ក្រសួងសាធារណការ និងដឹកជញ្ជូន បានត្រៀមសិក្សាគម្រោងអភិវឌ្ឍន៍ហេដ្ឋារចនាសម្ព័ន្ធសំខាន់ៗ ដើម្បីជំរុញការអនុវត្តផែនការមេ ស្តីពីប្រព័ន្ធដឹកជញ្ជូនអន្តរមធ្យោបាយនិងភស្តុភារកម្មកម្ពុជា ២០២៣-២០៣៣ ដើម្បីកាត់បន្ថយតម្លៃឡូជីស្ទីកនិងប្រកួតប្រជែង។ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ក្នុងពិធីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅឆ្នាំ២០២៦ នៅព្រឹកថ្ងៃទី៥ ខែកុម្ភៈ ឆ្នាំ២០២៦ នាទីស្តីការក្រសួងសាធារណការ និងដឹកជញ្ជូន បានមានប្រសាសន៍ថា ការអភិវឌ្ឍហេដ្ឋារចនាសម្ព័ន្ធភស្តុភារកម្ម ក្រសួងបាននិងកំពុងខិតខំក្នុងការជំរុញ រៀបចំសេចក្តីព្រាងច្បាប់ស្តីពីភស្តុភារកម្ម, ការបន្តសហការយ៉ាងជិតស្និទ្ធជាមួយភាគីពាក់ព័ន្ធ ក្នុងការជំរុញបើកការដ្ឋានសាងសង់គម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (PP-LC), ការជំរុញសិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុង ព្រះសីហនុ(SHV-LC)។ ឯកឧត្តមបានបន្តថា ចំពោះការអភិវឌ្ឍហេដ្ឋារចនាសម្ព័ន្ធភស្តុភារកម្មនេះ ក្រសួងក៏បានធ្វើការសិក្សាគម្រោងអភិវឌ្ឍន៍ហេដ្ឋារចនាសម្ព័ន្ធច្រកទ្វារព្រំដែនចំនួន ៤ រួមមាន ១.ច្រកទ្វារព្រំដែនភ្នំដិន-ខេត្តតាកែវ ២.ច្រកទ្វារព្រំដែនត្រពាំងផ្លុង-ខេត្តត្បូងឃ្មុំ ៣.ច្រកទ្វារព្រំដែនត្រពាំងស្រែ-ខេត្តក្រចេះ និង៤.ច្រកទ្វារព្រំដែនអូយ៉ាដាវ-ខេត្តរតនគិរី និង ការត្រៀមរៀបចំសិក្សាគម្រោងអភិវឌ្ឍន៍ហេដ្ឋារចនាសម្ព័ន្ធសំខាន់ៗ ដើម្បីជំរុញការអនុវត្ត ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ រួមទាំងការទាក់ទាញ និងកៀរគរវិនិយោគិនឱ្យមកវិនិយោគលើគម្រោងថ្មីៗ ដើម្បីកាត់បន្ថយតម្លៃឡូជីស្ទីក និងលើកកម្ពស់សមត្ថភាពប្រកួតប្រជែងរបស់កម្ពុជា៕