កិច្ចប្រជុំ(Kick-off Meeting) ក្នុងដំណើរបេសកកម្មបច្ចេកទេសគាំទ្រគម្រោងរបស់ក្រុមការងារធនាគារពិភពលោក(WB) ក្នុងគម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងប្លាស្ទិក នៅកម្ពុជា ទីស្ដីការក្រសួង៖ ថ្ងៃចន្ទ ទី២ ខែកុម្ភ: ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំប្រតិភូក្រសួង និងសមាជិក សមាជិកាគម្រោង ចូលរួមកិច្ចប្រជុំ(Kick-off Meeting) ដើម្បីពិនិត្យ និងពិភាក្សាការងារក្នុងដំណើរបេសកកម្មបច្ចេកទេសគាំទ្រគម្រោងរបស់ក្រុមការងារធនាគារពិភពលោក(WB) ក្នុងគម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងប្លាស្ទិក នៅកម្ពុជា ដែលដឹកនាំដោយលោកស្រី Katelijn Van Den Berg អ្នកឯកទេសជាន់ខ្ពស់ ផ្នែកបរិស្ថាន និងជាប្រធានក្រុមការងារ ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ លោកប្រធានគ្រប់គ្រងគម្រោង មន្ត្រីជំនាញបច្ចេកទេសជាសមាជិក សមាជិកាគម្រោង ក្រុមការងាររបស់ធនាគារពិភពលោក តំណាងក្រសួងមហាផ្ទៃ តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងបរិស្ថាន តំណាងសាលាខេត្តកណ្តាល តំណាងក្រុមហ៊ុនទីប្រឹក្សា រួមជាមួយស្ថាប័ន និងមន្ត្រីពាក់ព័ន្ធការងារគម្រោង។ កិច្ចប្រជុំនេះធ្វើឡើងដើម្បីពិភាក្សាអំពីការចាប់ផ្តើមនៃការរចនាប្លង់លម្អិតសម្រាប់ទីលានទុកដាក់សំរាម និងកន្លែងប្រព្រឹត្តកម្មកាកសំណល់រឹង នៅខេត្តសៀមរាប ខេត្តកណ្តាល និងខេត្តកំពង់ស្ពឺ ដើម្បីជាមូលដ្ឋានក្នុងការចុះទៅពិនិត្យនៅតាមខេត្ត/ក្រុង និងទីតាំងគម្រោងដែលបានជ្រើសរើស និងពិនិត្យលើវឌ្ឍនភាពលើការកំណត់ជម្រើសសម្រាប់ផ្ទៃដីបន្ថែមដែលត្រូវការសម្រាប់ទីលានទុកដាក់សំរាមនៅខេត្តកណ្តាល និងវឌ្ឍនភាពទូទៅ សកម្មភាពផ្សេងៗ ដើម្បីពន្លឿនការអនុវត្តគម្រោងឱ្យកាន់តែប្រសើរឡើងថែមទៀត។ សូមបញ្ជាក់ជូនផងដែរថា៖ បន្ទាប់ពីកិច្ចប្រជុំនៅក្រសួងសាធារណការ និងដឹកជញ្ជូន ត្រូវបានបញ្ចប់ ប្រតិភូក្រុមការងារទាំងអស់ក៏បានបន្តដំណើរទៅពិនិត្យទីតាំងចាក់សំរាម ចំនួន២ទីតាំង និងទីតាំងថ្មី ដែលត្រៀមសាងសង់ទីលានទុកដាក់សំរាម និងបានបន្តកិច្ចប្រជុំពិភាក្សាការងារបន្ថែមនៅទីនោះ៕