កិច្ចប្រជុំពិនិត្យវឌ្ឍនភាពការងារត្រៀមរៀបចំសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ នាថ្ងៃចន្ទ ទី២ ខែកុម្ភៈ ឆ្នាំ២០២៦ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានគណៈកម្មការរៀបចំសន្និបាត បានអញ្ជើញដឹកនាំកិច្ចប្រជុំគណៈកម្មការរៀបចំសន្និបាតក្រសួង ដោយមានការអញ្ជើញចូលរួមពីឯកឧត្តម លោកជំទាវ ជាថ្នាក់ដឹកនាំ និងអគ្គនាយក ព្រមទាំងលោក លោកស្រី ជាសមាជិក-សមាជិកា។ កិច្ចប្រជុំនេះរៀបចំឡើងក្នុងគោលបំណង ពិនិត្យលើវឌ្ឍនភាពការងាររបស់អនុគណៈកម្មការទាំង៧ តាមរយៈការស្តាប់នូវសេចក្តីរាយការណ៍សង្ខេបអំពីវឌ្ឍនភាពការងាររបស់អនុគណៈកម្មការនីមួយៗដែលសម្រេចបាន ព្រមទាំងបញ្ហាប្រឈម និងសំណូមពរដែលបានស្នើឡើងផងដែរ។ ថ្លែងទៅកាន់អង្គប្រជុំ លោកជំទាវប្រធានគណៈកម្មការ បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងសមាជិក សមាជិកានៃគណៈកម្មការ និងអនុគណៈកម្មការទាំងអស់ ដែលបានខិតខំប្រឹងប្រែងរួមគ្នាសម្រេចនូវ វឌ្ឍនភាពការងារ និងធានាឱ្យដំណើរការសន្និបាតប្រចាំឆ្នាំរបស់ក្រសួង នៅថ្ងៃទី៥-៦ ខែកុម្ភៈ ឆ្នាំ២០២៦ ខាងមុខ អាចប្រព្រឹត្តទៅបានរលូន ប្រកបដោយប្រសិទ្ធភាព៕