កិច្ចប្រជុំរវាងក្រសួងសាធារណការ និងដឹកជញ្ជូន និងស្ថាប័នហេដ្ឋារចនាសម្ព័ន្ធអាស៊ី (Infrastructure Asia) ស្តីពីវិស័យអាទិភាពឆ្នាំ២០២៦ សម្រាប់កិច្ចសហការក្នុងការលើកកម្ពស់ហេដ្ឋារចនាសម្ព័ន្ធដឹកជញ្ជូនប្រកបដោយប្រសិទ្ធភាព ទីស្តីការក្រសួង៖ នាថ្ងៃព្រហស្បតិ៍ ទី២៩ ខែមករា ឆ្នាំ ២០២៦ ឯកឧត្តម ឈៀង ពេជ្រ អនុរដ្ឋលេខាធិការ ក្រសួងសាធារណការ និងដឹកជញ្ជូន អញ្ជើញទទួលជួបពិភាក្សាការងារជាមួយស្ថាប័នហេដ្ឋារចនាសម្ព័ន្ធអាស៊ី (IA - Infrastructure Asia) ដឹកនាំដោយ លោក Lavan Thiru នាយកប្រតិបត្តិ និងមានការអញ្ជើញចូលរួមពីថ្នាក់ដឹកនាំអគ្គនាយកភស្តុភារកម្ម និងមន្រ្តីជំនាញពាក់ព័ន្ធចំណុះអគ្គនាយកដ្ឋានភស្ដុភារកម្មជាច្រើនរូបផងដែរ។។ កិច្ចប្រជុំនេះបានផ្តោតលើ៖ (១). ការផ្លាស់ប្តូរយោបល់អំពីផែនការ និងទិសដៅអាទិភាពរបស់ក្រសួងសម្រាប់ឆ្នាំ ២០២៦, (២). ការចែករំលែកអាទិភាព និងទិសដៅយុទ្ធសាស្ត្ររបស់ InfraAsia សម្រាប់ឆ្នាំ ២០២៦, (៣). ការពិភាក្សាអំពីឱកាសសហការនានាក្នុងវិស័យហេដ្ឋារចនាសម្ព័ន្ធដឹកជញ្ជូន និងភស្ដុភារកម្ម និង (៤). វេទិកាសំខាន់ Asia Infrastructure Forum 2026 សម្រាប់ការសហការរដ្ឋ–ឯកជន និងការផ្សព្វផ្សាយគម្រោងហេដ្ឋារចនាសម្ព័ន្ធប្រកបដោយចីរភាព។ ក្នុងឱកាសនេះ ឯកឧត្តម អនុរដ្ឋលេខាធិការ ក៏បានណែនាំអំពីគម្រោង Sihanouk Ville Logistics Complex និងផែនការរៀបចំសន្និសីទវិនិយោគិនអន្តរជាតិនៅប្រទេសសិង្ហបុរី ដែលគ្រោងនឹងធ្វើឡើងនៅដើមខែមីនា ឆ្នាំ ២០២៦ ដើម្បីទាក់ទាញវិនិយោគិន និងដៃគូយុទ្ធសាស្ត្រ។ លើសពីនេះទៀត កិច្ចប្រជុំនេះបង្ហាញពីការប្តេជ្ញារួមគ្នារបស់ភាគីទាំងពីរក្នុងការលើកកម្ពស់ហេដ្ឋារចនាសម្ព័ន្ធដឹកជញ្ជូនប្រកបដោយប្រសិទ្ធភាព ចីរភាព និងការចូលរួមពីវិស័យឯកជនសម្រាប់ការអភិវឌ្ឍសេដ្ឋកិច្ចជាតិ និងតំបន់៕