ប្រជាពលរដ្ឋក្នុងស្រុកកែវសីមា ទទួលបានការពិនិត្យព្យាបាលជម្ងឺដោយឥតគិតថ្លៃ ចំនួនពីរថ្ងៃ នៅថ្ងៃទី២៦-២៧ ខែមករា ឆ្នាំ២០២៦ មណ្ឌលគិរី៖ ឯកឧត្តម សួន សុខឃីម រដ្ឋលេខាធិការ ក្រសួងផែនការ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកកែវសីមា តំណាងដ៏ខ្ពង់ខ្ពស់ ឯកឧត្តម ឈួន វិន ប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី អញ្ជើញ ជាអធិបតីក្នុងកម្មវិធីពិនិត្យព្យាបាលជម្ងឺដោយឥតគិតថ្លៃជូនប្រជាពលរដ្ឋក្នុងស្រុកកែវសីមា ក្រោមកិច្ចសហការគាំទ្រពីអង្គការព័ន្ធកិច្ចគ្រិស្តបរិស័ទកម្ពុជា ដោយមានរយៈពេលចំនួនពីរថ្ងៃ គឺថ្ងៃទី២៦-២៧ ខែមករា ឆ្នាំ២០២៦ ក្នុងគោលបំណងដើម្បីពិនិត្យព្យាបាលជម្ងឺទូទៅ ចែកថ្នាំ វាស់ភ្នែក ចែកវ៉ែនតា ពិនិត្យសុខភាពមាត់ធ្មេញ និងពិនិត្យអេកូជូនប្រជាពលរដ្ឋដោយឥតគិតថ្លៃ ។ ក្នុងមតិសំណេះសំណាល និងបើកកម្មវិធី ឯកឧត្តម សួន សុខឃីម បានជម្រាបជូនអង្គពិធីពីការដាក់ចេញយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលនិកាលទី៧នៃរដ្ឋសភា ដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដើម្បីឈានទៅសម្រេចចក្ខុវិស័យឱ្យកម្ពុជាក្លាយជាប្រទេសមានសេដ្ឋកិច្ចរីកចម្រើននៅឆ្នាំ២០៥០។ ឯកឧត្តមក៏បានរំលេចជូនដល់អង្គពិធីផងដែរថា កម្មវិធីពិនិត្យព្យាបាលជូនប្រជាពលរដ្ឋសហគមន៍ក្រីក្រនាពេលនេះ គឺជាការចូលរួមចំណែកជាមួយរាជរដ្ឋាភិបាលអនុវត្តយុទ្ធសាស្ត្របញ្ចកោណដំណាក់កាលទី១ ដែលគោលនយោបាយអាទិភាពទាំង៦ នៃយុទ្ធសាស្ត្របញ្ចកោណ ដំណាក់កាលទី១ មានចែងអំពីការពង្រឹងពង្រីកសេវាថែរទាំសុខភាព។ ឯកឧត្តមបានអរគុណចំពោះវត្តមានប្រជាពលរដ្ឋដែលបានមកចូលរួមយ៉ាងច្រើនកុះករក្នុងពិធី និងលើកទឹកចិត្ត សូមពួកគាត់ជួយផ្សព្វផ្សាយបន្តទៅដល់បងប្អូនដែលមិនទាន់បានទទួលសេវា ឱ្យមកទទួលសេវាដ៏មានសារសំខាន់ និងមានតែរយៈពេលខ្លីចំនួនត្រឹមតែ២ថ្ងៃ។ ឯកឧត្តមក៏បានថ្លែងអំណរគុណចំពោះអង្គការព័ន្ធកិច្ចគ្រិស្តបរិស័ទកម្ពុជា ជាពិសេស លោក ហ៊ុន សុខុម ប្រធានអង្គការ ដៃគូម្ចាស់ជំនួយ និងក្រុមគ្រូពេទ្យទាំងអស់ដែលបានជួយពិនិត្យព្យាបាលជូនដល់ប្រជាពលរដ្ឋនៅស្រុកកែវសីមា និងបានសំណូមពរផងដែរចំពោះប្រធានអង្គការ និងម្ចាស់ជំនួយ សូមឱ្យបន្តជួយដល់ប្រជាពលរដ្ឋសហគមន៍គ្រួសារក្រីក្រនៅកែវសីមានេះជាបន្តទៀត ជាពិសេសបងប្អូនដែលរស់នៅខាងតំបន់ខាងក្នុងឆ្ងាយពីទីប្រជុំជន៕