រដ្ឋបាលសង្កាត់ទឹកល្អក់ទី៣ ស្ថាបនាដាក់លូថ្មី មួយខ្សែឡើងវិញ ជូនប្រជាពលរដ្ឋក្នុងមូលដ្ឋាន សម្រួលការរស់នៅដែលជួបទុកលំបាកកន្លងមក។ កំណាត់ផ្លូវលេខ២១៨ ប្រវែង ៤៨០ម៉ែត្រ ក្នុងសង្កាត់ទឹកល្អក់ទី៣ ខណ្ឌទួលគោក អាជ្ញាធរកំពុងមានការផ្លាស់ប្តូរ ប្រព័ន្ធលូមួយខ្សែ ដើម្បីសម្រួលទៅដល់ប្រព័ន្ធលំហូរទឹក កុំអោយលិចលង់ នារដូវធ្លាក់ភ្លៀងខាងមុខ។លោកស្រី ជីង ពលរដ្ឋរស់នៅចំណុចផ្លូវលេខ២១៨ ខាងលើប្រាប់អោយដឹងថា ចាប់តាំងពីដើមឆ្នាំ២០២៦មក ប្រព័ន្ធលូតំបន់នេះ មានការហូរយឺតខ្លាំងទៅៗ ដោយសារតែប្រព័ន្ធលូចាស់ ទើបបង្កការលំបាកដល់ ពួកគាត់ជាប្រជាពលរដ្ឋ។ ពលរដ្ឋបន្តថា មិនថាទឹកប្រើប្រាស់រួចក្នុងផ្ទះផងដែរ ទម្រាំតែហូរទៅអស់រាងយូរគួរសមដែរ។លោក រ័ក្ស ជាពលរដ្ឋនៅតំបន់នោះក៏បានបញ្ជាក់ថា សូមអរគុណអាជ្ញាធរ ក្រោយមានការស្នើសុំពីពលរដ្ឋរស់នៅក្នុងមូលដ្ឋាន អាជ្ញាធរបានដាក់គ្រឿងចក្រកាយ លូចាស់ ដាក់លូថ្មីជូនពួកគាត់ ក្រោយប្រព័ន្ធលូចាស់ មានការកកស្ទះ នឹងចំណុចខ្លះទៀតរងខូចខាត ដើម្បីសម្រួលទុកលំបាក។ពាក់ព័ន្ធការអភិវឌ្ឍន៍នេះ លោក នៅ ភក្តី ចៅសង្កាត់រងទី១ បានបញ្ជាក់អោយដឹងថា ចំពោះការដ្ឋានកំពុងដំណើរការដាក់ប្រព័ន្ធលូនេះ គឺជាកញ្ចប់ថវិកាគម្រោងអភិវឌ្ឍន៍ឆ្នាំ២០២៥ នៅសេសសល់ ដោយខាងសង្កាត់យកមកធ្វើបង្ហើយជូនប្រជាពលរដ្ឋ អោយទទួលបាននូវភាពងាយស្រួលរស់នៅឡើងវិញ៕