គម្រោងស្ថាបនា "ស្ពានឆ្លងកាត់ទន្លេបាសាក់ ចាក់អង្រែក្រោម-ព្រែកប្រា" គិតត្រឹមដើមខែមករា ឆ្នាំ២០២៦ សម្រេចការងារបាន ៥៤,២% ហើយ! នេះបើយោងតាមលទ្ធផលទទួលបានពី ការចុះពិនិត្យតាមដាន ការអនុវត្តគម្រោង កាលពីថ្ងៃទី ៦មករាកន្លងទៅ ដោយ ឯ. សួង ហេង រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកជានាយកគម្រោង។ វឌ្ឍនភាពគម្រោង គិតត្រឹមដំណាច់ខែធ្នូ ឆ្នាំ២០២៥ សម្រេចបាន ៥៤,២% លឿនជាងផែនការ ៣,៤៥% ក្នុងនោះ៖ ១/ ផ្នែកគ្រឹះស្ពាន សម្រេច ១០០%។ ២/ រចនាសម្ព័ន្ធ ក្រោមស្ពានសម្រេចបាន៨៩% (ជញ្ជាំងក្បាលស្ពាន ចំនួន៤ សម្រេចបាន ២ ក្បាលសសរស្ពានចំនួន៤ សម្រេចបាន២ តួសសរស្ពាន ១២ រួចរាល់ សសរស្ពាន៥២ រួចរាល់ និងធ្នឹមភ្ជាប់ក្បាលសសរទទឹងស្ពាន ចំនួន៣៤ សម្រេចបាន៣០ ធ្នឹម )។ ៣/ រចនាសម្ព័ន្ធលើស្ពាន សម្រេចបាន២៩% ( ធ្នឹមT តម្លើង ១៨០ដើម សម្រេចបាន៨៣ និងធ្នឹម T ចាក់នៅកន្លែង ១៨០ ដើម សម្រេចបាន ៦៦ )។ ៤/បណ្តាញផ្លូវ សម្រេចបាន ៣១,៣០% (តភ្ជាប់ ប្រវែង ៨០៤,៣០ម សម្រេចបាន ២៩% និងផ្លូវបង្វែរទិស( Ram) ប្រវែង ១,៥៤ម. សម្រេចបាន ៣៦%)។ បន្ថែមពីនេះ ក្រុមការងារគម្រោង ក៏បានចុះពិនិត្យស្ថានភាពជម្រើស តម្រាយផ្លូវសម្រាប់ដឹកជញ្ជូនធ្នឹម T ពីការដ្ឋានចាក់ធ្នឹម ខាងលិចស្ពានទៅខាងកើតស្ពាន ដោយជំរុញឱ្យក្រុមហ៊ុនសាងសង់សិក្សា គិតគូរឱ្យបានល្អិតល្អន់បន្ថែម លើជម្រើសខ្សែផ្លូវ និងប្រភេទមធ្យោបាយដឹកជញ្ជូន ដើម្បីជៀសវាង ការខូចខាតផ្លូវនិងស្ពាន ដែលមាននៅលើដងផ្លូវដែលត្រូវជ្រើសរើស សម្រាប់ការដឹកជញ្ជូនធ្នឹម ផងដែរ។ គួររម្លឹកផងថា គម្រោងស្ថាបនាស្ពានមួយខ្សែនេះ បានបើកការដ្ឋានសាងសង់ នាថ្ងៃទី១៩ ខែកុម្ភៈ ឆ្នាំ២០២៤ កន្លងទៅ ហើយគម្រោងនេះ គ្រោងចំណាយពេលសរុប ៤២ខែ ដើម្បីសម្រេចបានលទ្ធផលទាំងមូល។