ការងារអភិវឌ្ឍន៍ជនបទក្រោមការជំរុញពីក្រសួងអភិវឌ្ឍន៍ជនបទ ខេត្តក្រចេះសម្រេចបានការស្ថាបនាផ្លូវបេតុងប្រវែង ២ គីឡូម៉ែត្រ, ផ្លូវក្រាលក្រៅស៊ូពីរជាន់ (DBST) ប្រវែង ៨២,៤០គីឡូម៉ែត្រ រួមទាំងផ្លូវក្រាលល្បាយក្រួសប្រវែង ២.២៥៩,៩៤ គីឡូម៉ែត្រ។ នេះបើយោងតាមការលើកឡើងពីលោក វ៉ា ថន អភិបាលខេត្តក្រចេះ ក្នុងឱកាសចូលរួមក្នុងពិធីបើកការរដ្ឋានសាងសង់ផ្លូវចំនួន ១៤ ខ្សែកាលពីពេលថ្មីៗកន្លងទៅនេះ។ចំពោះការងារធ្វើឱ្យប្រសើរឡើងលើវិស័យផ្គត់ផ្គង់ទឹកស្អាត និងអនាម័យជនបទ អត្រាគ្រប់ដណ្តប់ទឹកស្អាតក្នុងខេត្តក្រចេះ គិតត្រឹមឆ្នាំ២០២៥ សម្រេចបាន ៨៦,០៦% អត្រាគ្រប់ដណ្តប់អនាម័យត្រូវបានប្រកាសជាខេត្តបញ្ចប់ការបន្ទោរបង់ពាសវាលពាសកាល កាលពីថ្ងៃទី៥ ខែឧសភា ឆ្នាំ២០២៥ ដែលក្នុងនោះគ្រួសារ ៩០% មានបង្គន់ផ្ទាល់ខ្លួនប្រើប្រាស់ និង ១០% ប្រើប្រាស់រួមជាមួយសាច់ញាតិ។ជាមួយគ្នានេះ រដ្ឋបាលខេត្តនិងមន្ទីរអភិវឌ្ឍន៍ជនបទក៏ទទួលបានគម្រោងកែលម្អលើកកម្ពស់កម្រិតគុណភាពផ្លូវពីក្រាលក្រួសធម្មជាតិមកជាផ្លូវកៅស៊ូពីរជាន់ ចំនួន ១៤ ខ្សែ ប្រវែង ១៣៤,៤០ គីឡូម៉ែត្រ ស្ថិតនៅក្នុងស្រុកចិត្របុរី ស្រុកស្នួល ស្រុកព្រែកប្រសព្វ និងក្រុងក្រចេះ ក្នុងនោះជំហានទី១ ប្រវែង ៦១,៥ គម សម្រេចបាន ៦២,៥១% និងជំហានទី២ ប្រវែង ៧២,៩គម សម្រេចបាន ៣,១១% បាននឹងកំពុងអនុវត្តបន្តដល់សព្វថ្ងៃ៕