ពលរដ្ឋរស់នៅឃុំបឹងចារ ឃុំកំពង់ចាម និងឃុំវឌ្ឍន: ក្នុងស្រុកសំបូរ ខេត្តក្រចេះ បានលើកឡើងជារឿងៗអំពីបញ្ហាស្ពានឈើ និងស្ពានបាឡេជាច្រើនកន្លែង ដែលចាស់ទ្រុឌទ្រោម បង្កបញ្ហាសុវត្តិភាពនៅពេលធ្វើដំណើរ និងការដឹកជញ្ជូនកសិផល-ទំនិញផ្សេងៗ។ស្ពានទាំងនោះរួមមាន៖ ស្ពានយាវ ស្ពានអូរគ្រួត ស្ពានទន្សោងធ្លាក់ ស្ពានប្រិយ និងស្ពានអាជេន ដែលស្ថិតក្នុងឃុំបឹងចារ ឃុំកំពង់ចាម និងឃុំវឌ្ឍន: ក្នុងស្រុកសំបូរ។ជាការឆ្លើយតបចំពោះការលើកឡើងរបស់ពលរដ្ឋ កាលពីថ្ងៃទី៥ ខែមេសា ឆ្នាំ២០២៤ មន្ទីរអភិវឌ្ឍន៍ជនបទខេត្តក្រចេះ បានចូលរួមសហការជាមួយ ទីប្រឹក្សាសិក្សាគម្រោង នៃក្រសួងអភិវឌ្ឍន៍ជនបទ ទៅបង្ហាញទីតាំងក្រុមការងារខួងដីពិសោធន៍គ្រឹះស្ពាន សម្រាប់សាងសង់ស្ពានបេតុងចំនួន ៩ កន្លែង ក្នុងខេត្តក្រចេះ ក្នុងនោះក៏មានស្ពានយាវ ស្ពានអូរគ្រួត ស្ពានទន្សោងធ្លាក់ ស្ពានប្រិយ និងស្ពានអាជេន ផងដែរ។ស្ពានទាំង ៥ កន្លែងខាងលើ មន្ទីរអភិវឌ្ឍន៍ជនបទខេត្តក្រចេះបានដាក់ចូលក្នុងគម្រោងរបស់ដៃគូរអភិវឌ្ឍន៍រួចរាល់ ដែលគ្រោងសាងសងជាស្ពានបេតុង។ បច្ចុប្បន្នគម្រោងកំពុងស្ថិតក្នុងនីតិវិធីលទកម្ម។ នេះជាការបញ្ជាក់ពីមន្ទីរអភិវឌ្ឍន៍ជនបទខេត្តក្រចេះ។ ពលរដ្ឋរំពឹងថា នឹងទទួលបានស្ពានបេតុងថ្មីក្នុងពេលឆាប់ៗពីរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ ដើម្បីដោះស្រាយបញ្ហាប្រឈមក្នុងការរស់នៅប្រចាំថ្ងៃ ធ្វើឱ្យកសិផលទទួលបានតម្លៃសមរម្យ ក៏ដូចជាជួយជំរុញឲ្យពលរដ្ឋកាន់តែខិតខំប្រឹងប្រែងក្នុងការដាំដុះបន្ថែមទៀត៕