ផ្លូវថ្មីមួយខ្សែត្រូវបានអាជ្ញាធរឈូសសម្រួលតភ្ជាប់ការធ្វើដំណើរពីតំបន់អេកូទេសចរណ៍ជីផាត ទៅដល់តំបន់អេកូទេសចរណ៍អារ៉ែងក្នុងស្រុកថ្មបាំងខេត្តកោះកុង។លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានប្រាប់កម្ពុជាថ្មីថា ផ្លូវដែលអាជ្ញាធរបានឈូសសម្រួលនេះមានប្រវែងជាង ៣០ គីឡូម៉ែត្រ ដែលតភ្ជាប់ពីតំបន់ទេសចរណ៍ជីផាត ទៅដល់តំបន់អេកូទេសចរណ៍អារ៉ែងក្នុងស្រុកថ្មបាំង។យ៉ាងណាមិញ ផ្លូវនេះអាចធ្វើដំណើរបាននៅរដូវប្រាំង នៅរដូវវស្សាអាចប្រឈមមានការដាច់ខ្លះៗដែលបង្កការលំបាកសម្រាប់យានយន្តធ្វើដំណើរឆ្លងកាត់។ក្រៅពីផ្លូវថ្មីដែលអាជ្ញាធរបានឈូសសម្រួលធ្វើដំណើរបណ្តោះអាសន្ន ផ្លូវទៅអារ៉ែងក្នុងស្រុកថ្មបាំងក៏កំពុងត្រូវបានស្ថាបនាជាផ្លូវកៅស៊ូនិងបេតុងចេញពីផ្លូវជាតិលេខ ៤៨ ដោយប្រើប្រាស់មូលនិធិពីដៃគូអភិវឌ្ឍ។ក្រសួងអភិវឌ្ឍន៍ជនបទកំពុងស្ថាបនាផ្លូវមួយខ្សែទៅអារ៉ែងចេញពីផ្លូវជាតិលេខ ៤៨ ត្រង់គីឡូម៉ែត្រលេខ ១១៥ ដែលការសាងសង់ចែកចេញជា ៣ កំណាត់ ដោយកំណាត់ទី ១ ប្រវែង ២៦ គីឡូម៉ែត្រ ជាគម្រោងរបស់ AIB សម្រេចបានការស្ថាបនាប្រហែល ៩០% ខណៈកំណាត់ពីស្រុកថ្មបាំងដល់ស្ទឹងអារ៉ែងប្រវែង ១៦ គីឡូម៉ែត្រជាគម្រោងរបស់ CSLEP ទើបបើកការដ្ឋានសាងសង់គ្រោងចំណាយពេលប្រហែល ១ ឆ្នាំ។ កន្លងទៅកំណាត់ផ្លូវជាង ១០ គីឡូម៉ែត្រក្នុងស្រុកថ្មបាំងដែលជាគម្រោងរបស់រដ្ឋាភិបាល តាមរយៈក្រសួងអភិវឌ្ឍន៍ជនបទ បានសាងសង់បញ្ចប់ដាក់ឲ្យប្រើប្រាស់។ លោក អៀង ដារ៉ាវុធ បានបញ្ជាក់ថា ផ្លូវដែលកំពុងសាងសង់ទៅស្ទឹងអារ៉ែងជាផ្លូវយុទ្ធសាស្ត្រដ៏សំខាន់ ដែលរាប់សិបឆ្នាំមកហើយមិនមានផ្លូវធ្វើដំណើរបានងាយស្រួលនោះទេ។ បើតាមមន្រ្តីរូបនេះ ផ្លូវដែលកំពុងស្ថាបនានេះថ្ងៃខាងមុខក៏នឹងតភ្ជាប់ផ្លូវមួយខ្សែដែលគ្រោងសាងសង់ចេញតំបន់ទេសចរណ៍ភ្នំខ្នងផ្សារក្នុងខេត្តកំពង់ស្ពឺ ដែលនឹងអាចតភ្ជាប់ទៅបណ្ដាខេត្តផ្សេងៗទៀតនៅតំបន់កណ្តាល៕