កិច្ចប្រជុំពិនិត្យពិភាក្សា ស្តីពីវឌ្ឍនភាពគម្រោងស្ថាបនា ស្តារ ជួសជុល និងថែទាំហេដ្ឋារចនាសម្ព័ន្ធផ្លូវថ្នល់ ទីស្តីការក្រសួង៖ នាថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២៥ ឯកឧត្តម ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ និងឯកឧត្តម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស បានដឹកនាំកិច្ចប្រជុំពិនិត្យពិភាក្សា ស្តីពីវឌ្ឍនភាពគម្រោងស្ថាបនា ស្តារ ជួសជុល និងថែទាំហេដ្ឋារចនាសម្ព័ន្ធផ្លូវថ្នល់ ក្រោមឥណទានថវិកាជំពូក២១ និងជំពូក៦១ ដោយមានការចូលរួម ពីអគ្គនាយករង ប្រធាននាយកដ្ឋាន តំណាងមន្ទីរសាធារណការ កងវិស្វកម្ម និងមន្ត្រីពាក់ព័ន្ធផងដែរ។ កិច្ចប្រជុំរៀបចំឡើងក្នុងគោលបំណងត្រួតពិនិត្យ អង្កេត តាមដាន និងពិភាក្សារួមគ្នាលើវឌ្ឍនភាពផែនការឆ្នាំ២០២៥ សម្រាប់ជំពូក២១ និងជំពូក៦១ និងបញ្ហាប្រឈម ព្រមទាំងដំណោះស្រាយ។ ឯកឧត្តម សហប្រធាននៃអង្គប្រជុំបានផ្តល់នូវអនុសាសន៍ល្អៗ បានណែនាំពីយន្តការសំខាន់ៗដើម្បីជំរុញឱ្យអង្គភាពអនុវត្ត និងត្រួតពិនិត្យគម្រោងពង្រឹងសមត្ថភាព និងយកចិត្តទុកដាក់ការអនុវត្តគម្រោង និងទូទាត់គម្រោងឱ្យបានទាន់ពេល មានប្រសិទ្ធភាព និងសម្រេចបានតាមការកំណត់។ អង្គភាពអនុវត្តគម្រោងទាំងអស់បានអះអាងយ៉ាងមុតមាំក្នុងការសម្រេចការងារក្នុងជំពូក៦១ ឱ្យទាន់ពេលវេលា ស្របតាមផែនការ និងធានាបាននូវប្រសិទ្ធភាព និងនិរន្តភាព៕