កាលពីថ្ងៃទី ២៨ ខែតុលា ឆ្នាំ២០២៥ អង្គភាពគ្រប់គ្រងគម្រោងសាងសង់ស្ពានឆ្លងទន្លេបាសាក់ចាក់អង្រែក្រោម-ព្រែកប្រា ដឹកនាំដោយលោក សួង ហេង រដ្ឋលេខាធិការ និងជានាយកគម្រោង បានចុះពិនិត្យតាមដានការអនុវត្តគម្រោង ក្រោយបើកការដ្ឋានសាងសង់ប្រមាណ ២០ ខែ។បើតាមមន្រ្តីក្រសួងសាធារណការនិងដឹកជញ្ជូន គិតត្រឹមដំណាច់ខែតុលា ឆ្នាំ២០២៥ នេះ ការដ្ឋានសាងសង់សម្រេចបានប្រមាណ ៥១% បន្ទាប់ពីសម្ពោធបើកការដ្ឋានសាងសង់ នាថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ វឌ្ឍនភាពការងារសំខាន់ៗដែលសម្រេចបានលើដំណើរការស្ថាបនាស្ពានឆ្លងទន្លេបាសាក់ចាក់អង្រែក្រោម-ព្រែកប្រារួមមាន៖១/ ផ្នែកគ្រឹះស្ពាន បានប្រមាណ ៩១,៦២% ក្នុងនោះសសរគ្រឹះចំនួន ១៥៦ ដើម សម្រេចបាន ១៤៨ ដើម ២០ជើងតាង សម្រេចបានចំនួន១៦ និងធ្នឹមភ្ជាប់ក្រោមចំនួន១២ សម្រេចបាន ១០០% ២/ រចនាសម្ព័ន្ធក្រោមស្ពានសម្រេចបាន ៦៨.៩១% រួមមានតួសរសរស្ពាន ១២ សម្រេចបាន ១០០% សរសរស្ពាន ៥២ សម្រេចបាន ៤០ និងធ្នឹមភ្ជាប់ក្បាលសរសរទទឹងស្ពានចំនួន ៣៤ សម្រេចបាន ២៣ ធ្នឹម ៣/ រចនាសម្ព័ន្ធផ្នែកលើស្ពានសម្រេចបានប្រមាណ ២៣% ៤/ការងារផ្លូវតភ្ជាប់សម្រេចបាន ១,៧ % ៥/ ការងារផ្លូវបង្វែរទិសចរាចរណ៍សម្រេចបាន ៤% ព្រមទាំងការងារសំខាន់ៗមួយចំនួនទៀត។ខណៈរយៈពេលសាងសង់ស្មើនឹង ៤៧ ,៦២% នៃផែនការចំនួន ៤២ ខែ មន្រ្តីក្រសួងសាធាណការនិងដឹកជញ្ជូនបានអះអាងថា ដំណើរការសាងសង់មិនមានការយឺតយ៉ាវជាងកម្មវិធីការងារដែលបានគ្រោងទុកនោះទេ ដែលត្រៀមបញ្ចប់នៅចុងឆ្នាំ ២០២៧៕