និស្សិតជ័យលាភីអាហារូបករណ៍រដ្ឋាភិបាលប្រទេសអូស្ត្រាលី ទទួលអនុសាសន៍ផ្តាំផ្ញើល្អៗ មុនចេញដំណើរទៅបន្តការសិក្សា ទីស្តីការក្រសួង៖ នាថ្ងៃអង្គារ ទី២១ ខែតុលា ឆ្នាំ២០២៥ ឯកឧត្តម ឈួន វិន រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបសំណេះសំណាលជាមួយក្រុមនិសិ្សតជ័យលាភីអាហារូបករណ៍រដ្ឋាភិបាលប្រទេសអូស្ត្រាលី សម្រាប់ឆ្នាំ២០២៦ មុនចេញដំណើរទៅសិក្សា ដោយមានការចូលរួមពីសំណាក់ថ្នាក់ដឹកនាំក្រសួង និងមន្ត្រីពាក់ព័ន្ធផងដែរ។ ជំនួបនេះ ត្រូវបានធ្វើឡើង ដើម្បីចែករំលែកអំពីបទពិសោធន៍ អនុសាសន៍ និងការអនុវត្តល្អៗ ដែលជាទស្សនទានដ៏មានតម្លៃបំផុតសម្រាប់និស្សិតយកទៅផ្សព្វផ្សាយវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានយល់ដឹងអំពីប្រទេសកម្ពុជាកាន់តែច្បាស់ថែមទៀត។ បន្ថែមពីលើនេះឯកឧត្តម ក៏បានលើកឡើងអំពីសមិទ្ធផលសំខាន់ៗ និងការងារជាច្រើនដែលក្រសួង ក្នុងនាមជាសេនាធិការរបស់រាជរដ្ឋាភិបាល បាន និងកំពុងអនុវត្តលើវិស័យសាធារណការ និងដឹកជញ្ជូននៅកម្ពុជា ជាបន្តបន្ទាប់ឱ្យកាន់តែមានភាពល្អប្រសើរ។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានចូលរួមអបអរសាទរ កោតសរសើរចំពោះនិស្សិតជ័យលាភីទាំងអស់ និងបានពាំនាំនូវការផ្ដាំផ្ញើសាកសួរសុខទុក្ខពីសំណាក់ ឯកឧត្តមរដ្ឋមន្ត្រី ក៏ដូចជាជំរុញលើកទឹកចិត្តឱ្យនិស្សិតទាំងអស់ផ្ដោតសំខាន់លើការខិតខំប្រឹងប្រែងរៀនសូត្រទាំងនៅក្នុងសាលា និងស្វែងយល់ចំណេះដឹងបន្ថែម ពីមជ្ឈដ្ឋានខាងក្រៅឱ្យអស់ពីលទ្ធភាព និងសមត្ថភាពដែលខ្លួនមាន ដើម្បីទទួលបានលទ្ធផលល្អប្រសើរ ក្លាយជាទំពាំងដ៏ល្អ ដើម្បីចូលរួមកសាងប្រទេសជាតិជាមួយរាជរដ្ឋាភិបាលនៅពេលវិលត្រឡប់មកមាតុប្រទេសវិញ។ សូមជម្រាបដែរថា៖ និស្សិតអាហារូបករណ៍ដែលនឹងត្រូវបន្ដការសិក្សានៅប្រទេសអូស្ត្រាលីមានចំនួនសរុប ៥៥រូប ស្រី២៩រូប មានថ្នាក់អនុបណ្ឌិត៥៣រូប និងថ្នាក់បណ្ឌិត២រូប ក្នុងនោះមានមន្ត្រីរាជការមកពី ក្រសួង-ស្ថាប័ននានា អង្គការ សមាគម និងក្រុមហ៊ុនវិស័យឯកជន ដែលនឹងត្រូវសិក្សាលើមុខជំនាញ រួមមាន៖នវានុវត្តន៍ ខ្សែច្រវាក់ផ្គត់ផ្គង់ គោលនយោបាយសាធារណៈ ការវិភាគទិន្នន័យ បរិស្ថាន ច្បាប់ អប់រំ យេនឌ័រ គ្រប់គ្រង ការអភិវឌ្ឍ កសិធុរកិច្ច សហគ្រិនភាព និងនវានុវត្តន៍ សុខភាពសាធារណៈទេសចរណ៍ និងជំនាញផ្សេងៗទៀត៕