ភ្នំពេញ ៖ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានស្នើឱ្យក្រុមហ៊ុនចិន ចូលរួមចំណែកវិនិយោគនិងអភិវឌ្ឍហេដ្ឋារចនាសម្ព័ន្ធដឹកជញ្ជូន និងភស្តុភារកម្មនៅកម្ពុជាឱ្យកាន់តែល្អប្រសើរឡើង។ ក្នុងឱកាសដឹកនាំគណៈប្រតិភូក្រសួង ចុះបំពេញទស្សនកិច្ចសិក្សានៅសួនភស្តុភារកម្ម Jingdong Asia No.1 Logistics park ដែលជាបុត្រសម្ព័ន្ធរបស់ ក្រុមហ៊ុន JD.Com នៅទីក្រុងសៀងហៃនិង Jiaxing modern logistic park នៅខេត្ត Zhejiang ចាប់ពីថ្ងៃទី១៥-១៧ ខែតុលា ឆ្នាំ២០២៥ ឯកឧត្តម ហេង ណន បានគូសបញ្ជាក់អំពីសមទ្ធិផលសំខាន់ៗ នៃផ្នែកសាធារណការ និងដឹកជញ្ជូន ដែលកម្ពុជាសម្រេចបាននាពេលកន្លងមក និងជាពិសេសរាជរដ្ឋាភិបាល បានដាក់ចេញអនុវត្តផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដែលមានគម្រោងរហូតដល់១៧៤គម្រោង សម្រាប់ការអនុវត្តរយៈពេល១០ឆ្នាំ ព្រមទាំងបាននិងកំពុងពង្រាងនូវសេចក្តីព្រាងច្បាប់ស្តីពីភស្តុភារកម្មទៀតផង។ ឯកឧត្តម ក៏បានស្នើឱ្យក្រុមហ៊ុន Jingdong Asia No.1Logistics park និងក្រុមហ៊ុន Jiaxing Modern logistics park investment and development Co., Ltd សហការពិនិត្យមើលគម្រោងនៅក្នុងផែនការមេ ដែលក្រុមហ៊ុនអាចចូលរួមចំណែកវិនិយោគ និងអភិវឌ្ឍហេដ្ឋារចនាសម្ព័ន្ធដឹកជញ្ជូន និងភស្តុភារកម្មនៅព្រះរាជាណាចក្រកម្ពុជា និងបានថ្លែងអំណរគុណយ៉ាងជ្រាលជ្រៅចំពោះការស្វាគមន៍យ៉ាងកក់ក្តៅ ក៏ដូចជាឱកាស ដើម្បីមើលឃើញពីវិសាលភាព និងភាពទំនើបនៃប្រតិបត្តិការភស្តុភារកម្មរបស់សួនភស្តុភារកម្មទាំង ២ ទីតាំងចំពោះប្រតិភូកម្ពុជា។ សូមជម្រាបថា បេសកកម្មនេះធ្វើឡើងក្នុងគោលបំណងដើម្បីស្វែងយល់ពីប្រតិបត្តិការភស្តុភារកម្មទំនើប និងកម្រិតខ្ពស់សម្រាប់ពាណិជ្ជកម្មអេឡិចត្រូនិក ប្រព័ន្ធស្វ័យប្រវត្តិកម្មក្នុងវិស័យភស្តុភារកម្ម ការគ្រប់គ្រងឃ្លាំងតាមរយៈការប្រើប្រាស់ទិន្នន័យ និងស្វែងយល់នូវបទពិសោធ ព្រមទាំងបច្ចេកទេស ចំណេះដឹងផ្សេងៗដែលស្ថិតនៅ ក្នុងមណ្ឌល ភស្តុភារកម្ម ដែលអាចប្រើប្រាស់សម្រាប់ការអភិវឌ្ឍមណ្ឌលភស្តុភារកម្មនៅកម្ពុជាឱ្យទំនើប និងប្រសិទ្ធភាពខ្ពស់៕