ការដ្ឋានសាងសង់ផ្លូវក្រាលកៅស៊ូពីរជាន់ (DBST) និងផ្លូវកម្រាលបេតុ ១ ខ្សែ មានប្រវែងសរុប ២៦,១០ គ.ម ដែលតភ្ជាប់ពីផ្លូវជាតិលេខ ៤៨ ត្រង់គីឡូម៉ែត្រ ១១៧ ស្ថិតនៅក្នុងភូមិអន្លង់វ៉ាក់ ឃុំតាតៃក្រោម ស្រុកកោះកុង ដល់ភូមិត្រពាំងឈើត្រាវ ឃុំឬស្សីជ្រុំ ស្រុកថ្មបាំង ខេត្តកោះកុង សម្រេចបានវឌ្ឍនភាពប្រមាណ ៧៥% ហើយគ្រោងនឹងបញ្ចប់នៅពេលឆាប់ៗខាងមុខនេះ។ផ្លូវនេះបានចាប់ផ្តើមសាងសង់កាលពីខែមីនា ឆ្នាំ២០២៤ មានប្រវែងសរុប ២៦,១០គ.ម ក្នុងនោះក្រាលកៅស៊ូពីរជាន់មានប្រវែង ១៦,៧១៥ គ.ម ទទឹង ៨ ម៉ែត្រ និងក្រាលបេតុងប្រវែង ៩,៣៨៥ គ.ម ទទឹងចន្លោះពី ៨ ម៉ែត្រ ទៅ ១០ម៉ែត្រ ។តាមរយៈការស្ថាបនាផ្លូវមួយខ្សែនេះ នឹងផ្តល់ប្រយោជន៍ដល់ប្រជាពលរដ្ឋដែលជាអ្នកទទួលផលដោយផ្ទាល់ និងដោយប្រយោលប្រមាណ ៨៩៥ គ្រួសារ ខណៈផ្លូវមួយខ្សែនេះ គឺជាខ្សែផ្លូវយុទ្ធសាស្ត្រដ៏សំខាន់ដែលតភ្ជាប់ទីប្រជុំជនស្រុកថ្មបាំងមកផ្លូវជាតិលេខ ៤៨ និងឆ្ពោះទៅក្រុងខេមរភូមិន ដែលជាទីប្រជុំជនសំខាន់របស់ខេត្តកោះកុង ។ក្នុងឱកាសចុះពិនិត្យការដ្ឋានសាងសង់ផ្លូវខាងលើ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបានណែនាំដល់ទីប្រឹក្សាបច្ចេកទេស និងក្រុមហ៊ុនទទួលការសាងសង់ប្រចាំការនៅការដ្ឋានផ្ទាល់ឱ្យពន្លឿនការសាងសង់ ដោយត្រូវយកចិត្តទុកដាក់អនុវត្តឱ្យបានត្រឹមត្រូវតាមបទដ្ឋានបច្ចេកទេស និងគំនូសប្លង់ដូចមានក្នុងកិច្ចសន្យាការងារ ក្នុងគោលបំណងធានាឱ្យបានផ្លូវជាប់ប្រកបដោយគុណភាព មានភាពធន់ និងប្រើប្រាស់បានយូរអង្វែង៕